Бувайдада А. Жавлонов (исмлар шартли) И.Рахимовага онаси Х.Режавалиевани 7.000 АҚШ доллари (80.031.210 сўм) эвазига “Sheyх-777” туристик фирмаси орқали “Ҳаж” зиёратига юборишини айтиб, ундан 4.000 АҚШ доллари олган.

А. Жавлонов, бундан ташқари, У.Эгамбердиевга ота-онасини 14.000 АҚШ доллари (160.062.420 сўм) эвазига ўша туристик фирма орқали “Ҳаж”га юборишини айтиб, 8.200 АҚШ доллари,  О.Ахмедовдан 1.000 АҚШ доллари, Х.Усмоновдан 1.500 АҚШ доллари олган.

Фирибгар 2023 йил 29 май куни ҳуқуқни муҳофаза қилувчи орган ходимлари томонидан ушлангани сабабли “Ҳаж”га жўнатиш учун мазкур фуқаролардан пулларнинг қолган қисмини олишга “улгурмади”.

Суд, судланувчи, жабрланувчиларнинг кўрсатувларини, тарафларнинг музокара нутқларини, судланувчининг охирги сўзини тинглаб, жиноят иши материалларини ҳар томонлама, тўла ва холисона текшириб чиқиб судланувчи А. Жавлоновни Жиноят кодексининг 25,168-моддаси 3-қисми “а,б” бандлари билан айбли деб топиб, қонун санкциясида кўрсатилган жазони тайинлади.

Ўзбекистон қонунчилигига кўра, “Ҳаж” тадбирини ташкил этишга Дин ишлари бўйича қўмита ва Мусулмонлар идораси масъул бўлиб, бу сайёҳлик ташкилотлари ваколатига кирмайди.

 Абдурасул Миножиддинов,

жиноят ишлари бўйича Бувайда туман суди раиси