Қонунчиликка кўра, хусусий ташкилотлар ҳам ижтимоий таътилларни беришга мажбур. Меҳнат кодексинининг 237-моддасига кўра, ходимлар қуйидаги ижтимоий таътилларни олиш ҳуқуқидан фойдаланади:

▪️ ҳомиладорлик ва туғиш таътиллари (ушбу Кодекснинг 404-моддаси);

▪️ бола парваришлаш таътили (ушбу Кодекснинг 405-моддасининг биринчи ва иккинчи қисмлари);

▪️ ўқув таътили (ушбу Кодекснинг 385-моддасининг биринчи қисми);

▪️ ижодий таътиллар (ушбу Кодекснинг 387-моддасининг биринчи қисми).

Ходимларга юқорида назарда тутилган ижтимоий таътилларни бериш ходимнинг меҳнат стажига, у бажарадиган ишнинг жойи ва хусусиятига, иш берувчининг ташкилий-ҳуқуқий шаклига боғлиқ эмас.

Ёдда тутинг! Ҳомиладорлик ва туғиш таътили ва бошқа ижтимоий таътиллар иш берувчининг ташкилий-ҳуқуқий шаклидан қатъи назар, яъни у хусусий бўладими, бюджет ташкилоти бўладими тақдим қилинади ва тегишли тўловлар амалга оширилиб берилади.

Иш берувчи ходимга тегишли тўловларни тўлаб бермаса жавобгарликка сабаб бўлади. Маъмурий жавобгарлик тўғрисидаги кодексининг 49³-моддасига кўра, вақтинча меҳнатга қобилиятсизлик, ҳомиладорлик ва туғиш нафақаларини қонунчиликда белгиланган миқдорларда тўлаш бўйича мажбуриятдан бўйин товлаш, базавий ҳисоблаш миқдорининг 10 бараваридан 15 бараваригача (3 750 000 – 5 625 000 сўмгача) миқдорда жарима солишга сабаб бўлади.

Худди шундай ҳуқуқбузарлик маъмурий жазо чораси қўлланилганидан кейин бир йил давомида такроран содир этилган бўлса, базавий ҳисоблаш миқдорининг 15 бараваридан 30 бараваригача (5 625 000 – 11 250 000 сўмгача) миқдорда жарима солишга сабаб бўлади.