Ўзбекистонда хизмат кўрсатган актриса Лола Элтоева “Ўткан кунлар” фильмида Зайнаб, “Адибнинг умри” спектаклида Зарифа Саидносирова, “Масхарабоз” фильмида Тешаой, “Келгинди куёв” фильмида овсин каби ранг-баранг роллари билан оммага яхши таниш. Лола Элтоева эл севган актриса бўлиши билан бирга уч фарзанднинг онаси, севимли рафиқа. У якшанбани маданий масканларда ҳордиқ чиқариш билан ўтказишни тавсия қилади. Биз актёрлар, хусусан, театр актёрлари якшанба куни дам олмаймиз, чунки дам олиш кунлари театрлар халқ хизматида. Биз учун дам олиш куни – душанба. Мен душанбада талабаларга дарс беряпман, шунинг учун ҳафта давомида дам олиш куним йўқ ҳисоби. Лекин ҳаётим янада фаол кечаётганидан хурсандман. Театрга боришни тавсия қиламан. Ҳозир театрлар ҳам, репертуарлари ҳам ранг-баранг. Мени қувонтирадиган ҳолат шуки, энди залларимиз тўла, театрга кўп тушишяпти. Ўзбек Миллий академик драма театри саҳнасида кўплаб роллар ижро этаман. Охирги ролларимдан бири бу ёзувчи Назар Эшонқул қиссаси асосида саҳналаштирилган “Уруш одамлари” спектаклида Анзират ролини ўйнаяпман. Анзират – асарнинг бош қаҳрамони, уруш пайти тақдири синган кўплаб аёлларнинг бири. Бу катта психологик юки бор образ. Айримлар Анзиратни қоралашяпти. Бошқалар эса, аксинча, унинг тақдирига ачиниб, ҳатто йиғлашади. Тўти опам (Ўзбекистон халқ артисти Тўти Юсупова) раҳматли бу ролда Анзиратнинг тақдири, азоблари, ноиложликдан қилган гуноҳининг сабабларини томошабинга тушунтириш учун ролнинг бўёқлари ва урғуларини янада кучайтиришни маслаҳат бергандилар, бу бежиз эмас экан. Шунингдек, кинога ҳам тушишни тавсия қиламан. Ҳозирда кўплаб янги хорижий ва миллий кинофильмлар экранларда қўйиляпти. Улар орасида мен роль ўйнаган “101-рейс”, “Пулинг бўлса” каби фильмлар ҳам бор. Томошабинларнинг улар ҳақидаги фикрлари мен учун доим қизиқ. Оилавий театр ва кинога борганда шуни унутмаслик керакки, ҳозирда театрларга 12 ёшдан кичик боллар қўйилмайди. Бизнинг Ўзбек Миллий академик театрида бу тартибга қатъий амал қилинмоқда. Чунки катталар учун томошаларда болалар зерикишади, ота-оналарига ҳам, атрофдагиларга ҳам ноқулайлик бўлади. Асосийси, болажонларнинг ўзлари қийналиб кетишади. Шу сабабли, болажонларни ўзларига қизиқ томошаларга олиб бориш керак. [gallery size="medium" columns="5" td_select_gallery_slide="slide" td_gallery_title_input="Lola Eltoyeva" ids="8988,8987,8986,8985,8984,8983,8982,8980,8979,8978,8977,8976,8975,8974,8973,8972"]