Қонунчиликка асосан коммунал хизмат кўрсатувчи ташкилотлар қандай маълумотларни очиқлашга мажбур? Аҳолининг сўровига асосан қандай маълумотларни қанча муддатда бериб бориши керак? Агар ташкилотлар бу талабларга риоя этмаса, нима бўлади? Hudud24.uz колумнисти Муроджон Нажмиддинов шу сингари саволларга жавоб беради.

Сўз бошида таъкидлаш лозимки, кўп квартирали уйни бошқариш органи доимий равишда аҳолининг сўровномасига асосан коммунал хизматларнинг ҳажми (миқдори), умумий мол-мулкни сақлаш харажатлари тўғрисида маълумот бериб бориши шарт.

Умумий мол-мулк — кўп квартирали уйдаги умумий жойлар, таянч ва тўсиқ конструкциялар, квартиралар оралиғидаги иҳоталанган (ўрама) пиллапоялар, зинапоялар, лифтлар, лифтнинг шахталари ҳамда бошқа шахталар, даҳлизлар, техник қаватлар, ертўлалар, чердаклар ва томлар, уй ичидаги муҳандислик тармоқлари ва коммуникациялари, жойларнинг ташқарисида ёки ичида жойлашган ҳамда биттадан ортиқ жойга хизмат кўрсатадиган механик, электр, санитария-техника ускуналари ва қурилмалари ҳамда бошқа ускуна ва қурилмалар.

Коммунал хизмат кўрсатувчи ташкилот қандай маълумотларни очиқлаб бориши шарт?

Кўп квартирали уйларни бошқариш фаолиятини амалга ошириш қоидаларига асосан бошқариш органи доимий равишда қуйидаги маълумотларни жойлаштириб бориши шарт:

I. Бошқариш органи жойлашган ернинг кириш қисмида:

▪️ бошқариш органининг номи;

▪️ бошқариш органининг манзили;

▪️бошқариш органининг телефон рақамлари ва электрон почта манзили;

▪️ бошқариш органининг иш тартиби;

II. Кўп квартирали уйнинг барча кириш қисмлари ёки уй жойлашган ҳудудда жойлашган эълон тахтасида:

▪️бошқариш органининг номи, реестр рақами, манзили, иш вақти, телефон рақами, электрон почта манзили, веб-сайтининг манзили (агар мавжуд бўлса);

▪️барча коммунал хизмат кўрсатувчи ташкилотларнинг шошилинч хизматлари ва авария-диспетчерлик хизмати алоқа телефонлари;

▪️кўп квартирали уйнинг жойлар мулкдорлари ва бошқа фойдаланувчилар учун ноқулайлик туғдирадиган, режалаштирилган таъмирлаш-тиклаш ишлари ва бошқа тадбирлар ҳамда бундай тадбирлар ўтказиладиган вақт;

▪️мажбурий бадал ва (ёки) кўрсатилган хизматлар учун тўлов миқдори.

Агар ушбу маълумотлар ўзгарса, 3 иш куни ичида янгиланиши шарт.

Бошқариш органи қанча муддатда сўралган маълумотларни тақдим қилиши керак?

Бошқариш органи аҳолининг сўровномасига биноан, сўровнома келиб тушган кундан кейинги кундан кечиктирмай, сўралган маълумотларни бериши шарт.

Бошқариш органи қуйидаги масалалар юзасидан сўровнома келиб тушган кундан бошлаб 3 иш кунидан кечиктирмай қуйидаги маълумотларни тақдим этишга мажбур:

▪️уйнинг умумий ҳисоблагичи орқали ҳар ойда истеъмол қилинадиган коммунал хизматлар миқдори, кўп квартирали уйнинг турар ва нотурар жойлари истеъмол қиладиган коммунал хизматларнинг умумий ҳажми (миқдори), кўп квартирали уйдаги умумий мулкни сақлаш мақсадида сарфланган харажатлар тўғрисида маълумот;

▪️жойлар мулкдорлари ёки бошқа фойдаланувчиларининг ҳаёти, соғлиғи ва мулкига, мулкдорларнинг умумий мулкига зарар етказилганлиги тўғрисида, шунингдек, жойлар мулкдорлари ёки бошқа фойдаланувчиларга коммунал хизмат кўрсатиш қоидаларида назарда тутилган талабларнинг бузилиши тўғрисида маълумот;

▪️таъмирлаш ишлари ва кўрсатилган хизматлар сифатсиз бажарилганлиги ва (ёки) коммунал хизматлар кўрсатишда узилишлар белгиланган муддатдан ошиб кетганлиги тўғрисида маълумот.

Бошқа сўровномага жавоб сўровнома рўйхатга олинган кундан бошлаб 15 иш кунидан кечиктирмай берилади.

Сўровнома қандай юборилади?

Сўровнома почта орқали, шахсий қабулларда оғзаки ёки электрон шаклда юборилиши мумкин. Агар сўровномада бошқа шакл сўралмаган бўлса, маълумот сўровнома қабул қилинган шаклда тақдим этилади.

Шунингдек, бошқарув органига онлайн равишда мурожаат қилиш ҳам мумкин. Кўп квартирали уйга хизмат кўрсатувчи ташкилот (номи, манзили, алоқа рақамлари ва бошқалар) тўғрисидаги маълумотларни «Mening uyim» портали (https://my.kommunal.uz) орқали аниқлаш ва унга мурожаат қолдириш мумкин.

Ушбу порталдан фойдаланиш учун ЖШШИР кифоя қилади.

Порталда 18 та тоифадаги ҳолат бўйича хизмат кўрсатувчи ташкилотга мурожаат қолдириш, шунингдек, қўшнилар томонидан киритилган мурожаатларни кўриш ва аризалар ҳолатини кузатиш имконияти мавжуд.

Агар коммунал хизмат кўрсатувчи ташкилот ўз мажбуриятларини бажармаса, нима бўлади?

Хизмат кўрсатувчи ташкилот шартномадаги мажбуриятлар бажармаса, квартира эгалари у билан тузилган шартномани бекор қилиш масаласини ўзаро кўриб чиқиши мумкин.

Хусусан, «Кўп квартирали уйларни бошқариш тўғрисида»ги қонунга асосан коммунал хизмат кўрсатувчи ташкилот шартномани бажармаса, квартира эгалари умумий йиғилиш қарорига асосан шартномани бекор қилиш ва бошқа ташкилотни танлаш тўғрисида қарор қабул қилиши мумкин.

Коммунал хизмат кўрсатувчи ташкилотларга юклатилган мажбуриятлар ва уларни бажармасликнинг ҳуқуқий оқибатлари тўғрисида ушбу мақолада ўқинг.