Вазирлар Маҳкамаси 29 январь куни фуқаролар, уларнинг автотранспорт воситалари ва товарлари учун давлат чегарасини кесиб ўтишни соддалаштириш чора-тадбирларини тасдиқлади. 

Ҳужжатда чегарада автотранспорт воситалари учун “Электрон навбат” тизимини жорий этиш тўғрисидаги қоида мавжуд. Президент транспорт-логистика тизимини ривожлантириш бўйича қарорида 1 июнга қадар ушбу тизимни ишга туширишни топширган эди.

Тизим махсус алгоритм асосида чегарани кесиб ўтиш навбатини белгилайди. Бунда чегарада устуворликка эга бўлган товарлар ва транспорт воситалари ҳақидаги маълумотлар инобатга олинади.

Ҳайдовчилар Божхона қўмитаси веб-сайтидаги махсус бўлим орқали электрон навбатда жой банд қилишлари мумкин. Бунинг учун рўйхатдан ўтиш, электрон шаклни тўлдириш, оферта шартномаси шартларини ўқиб чиқиш ва қабул қилиш талаб этилади.

Ҳайдовчи ва транспорт воситаси ҳақидаги маълумотлар тизим томонидан текширилади. Ўзбекистон фуқароларининг аризалари келган тақдирда, текширув автомобильнинг қидирув базаларида йўқлигини ва мажбурий автосуқтанинг мавжудлигини ўз ичига олади.

Кўрсатилган маълумотлар тўғри бўлса, ариза берувчи божхона назоратидан ўтиш санаси ва вақти кўрсатилган штрих-кодли талон олади. Аризани унда кўрсатилган вақт бошланишидан олдин бекор қилиш мумкин.

Божхона постларида ҳайдовчилар учун пуллик кириш имконияти билан кутиш ҳудудлари ташкил этилади. Ҳудуд камида 100та автомобилга мўлжалланган бўлиши, шунингдек, дам олиш хонаси, ошхона, ҳожатхоналар, савдо шохобчалари, автосервис ва автоювиш хизматларини ўз ичига олиши керак.

Бундан ташқари, божхонадан тезкор ўтиш (Fast Track) тартиби тасдиқланди. Бунинг учун постларда махсус йўлаклар ва VIP заллар ташкил этилади.

“Fast Track” нархи ҳар бир киши учун базавий ҳисоблаш миқдорининг 15%ини (56 250 сўм) ташкил этади. Тўлов мобил иловалар орқали ёки банк хизмат кўрсатиш шохобчаларида амалга оширилади.

VIP-йўлакда жой банд қилиш бир йил давомида амал қилади. Хизмат фойдаланувчилари озиқ-овқат барлари, Wi-Fi тармоқли дам олиш хоналари, ибодат хоналари ва бошқа қулайликлардан фойдаланиш имкониятига эга бўладилар.