Истеъмолчи ўзи харид қилган маҳсулотни назорат тарозиларида тортиб олиш ҳуқуқига эга. Сиз ушбу ҳуқуқингиздан фойдаланасизми?

Байрам олди бозордан расталар оралаб нимадир, дейлик, гўшт харид қилдингиз. Сотувчи кўз ўнгингизда уни эпчиллик билан тарозида тортиб, сўнг полиэтилен пакетга жойлаб берди. Пулини тўлаб, растадан узоқлашдингиз. Бироз юриб негадир кўнглингиз ғаш тортди – гўштнинг вазни камроқдай... Атрофга қарайсиз, қани энди назорат тарози бўлса-ю, тортиб кўрсангиз ва шу хижилликдан қутулсангиз.

Ёки аксинча ҳолат – харид қилган маҳсулотингизнинг вазни камроқдай туюлаверди. Рўпарада эса бир эмас, иккита назорат тарозиси турибди. Қўлингиздаги маҳсулотни унга қўйиб, тортиб кўришга ёки андиша қиласиз ё шуни ўзингизга эп кўрмайсиз. Истеъмолчи сифатидаги ўз ҳуқуқингиздан фойдаланишни истамайсиз. “Инсофни ўзига берсин” дея йўлингизда давом этасиз. Ўзингизни алданган истеъмолчи сифатида ҳис қилиш сизга осонроқ. Ваҳолангки...

Вазирлар Маҳкамасининг “Ўзбекистон Республикасида чакана савдо қоидаларини ҳамда Ўзбекистон Республикасида умумий овқатланиш маҳсулотларини (хизматларини) ишлаб чиқариш ва сотиш қоидаларини тасдиқлаш тўғрисида”ги қарорига илова – Ўзбекистон Республикасида чакана савдо қоидаларига кўра, савдо залларида харидорларга қулай жойда назорат тарозилари ва бошқа ўлчаш воситалари ўрнатилган бўлиши керак.

Уч ва ундан кўп иш ўринли озиқ-овқат дўконларининг савдо залларида назорат тарозилари ўрнатилиши керак. Майдони 1500 кв.м ва ундан ортиқ бўлган савдо залларида назорат тарозилари икки жойда ўрнатилади.

Товарни сотишда харидорга мустақил равишда ёки сотувчи ходимнинг ёрдамида зарур товарлар билан танишиш, тош-тарозининг тўғрилигини, унга берилган товарнинг ўлчамини текшириш имкони берилиши керак.