Ногиронлиги бор шахслар ҳам даромад солиғи тўлайдими ёки умуман тўламайдими? Агар тўласа ойлик даромадининг қанча қисмидан тўлайди? Болаликдан ногиронлиги бўлган шахслар, шунингдек I ва II гуруҳ ногиронлари меҳнатга ҳақ тўлаш энг кам миқдорининг 3 баравари миқдоридаги даромадлари бўйича жисмоний шахслардан олинадиган даромад солиғи тўлашдан озод қилинган. Бу нима дегани? Ногиронлиги бўлган шахслар барча даромадлари учун солиқ тўлашдан озод қилинмаган. Улар ҳам солиқ тўлайди. Фақат даромадларининг чегараси белгиланган. Яъни, улар бир ойда энг кам иш ҳақининг з бараваригача даромад топса, солиқ тўламайди. Агар даромад миқдори ундан ошса, ҳамма жисмоний шахслар қатори даромад солиғи тўлайди. 2022 йил 1 мартдан ногиронлиги бўлган шахслар даромадларининг 2 466 000 сўм миқдори даромад солиғидан озод этилар эди. Чунки бу даврда энг кам иш ҳақи 822 000 сўм эди. 2022 йил 1 июндан бошлаб эса Ўзбекистон ҳудудида меҳнатга ҳақ тўлашнинг энг кам миқдори — ойига 920 000 сўм этиб белгиланди. Шундай экан, ҳозирда 2 760 000 миқдорида даромад топадиган шахснинг даромадига солиқ солинмайди. Мисол учун, ногирон шахснинг 1 ойлик даромади 4 000 000 сўмни ташкил этса, у ушбу даромаднинг фақатгина 1 240 000 сўмидан 12 фоиз миқдорида солиқ тўлайди. Эслатиб ўтамиз, бу имтиёз пенсия гувоҳномаси ёки тиббий-ижтимоий эксперт комиссиясининг маълумотномаси асосида берилади. Зоҳид Ҳалимов, Шофиркон туман адлия бўлими бошлиғи