Қорақалпоғистон Республикаси Нукус шаҳрида яшовчи 69 ёшли С.Г. Киберхавфсизлик марказига мурожаат қилиб, ўзига тегишли банк картасидан 9 млн сўм пул “номаълум шахс” томонидан ечиб олинганини маълум қилган. Тезкор-қидирув хизмати Киберхавфсизлик бўлинмалари томонидан мазкур жиноятни Қорақалпоғистон Республикаси Тахтакўпир туманида яшовчи 29 ёшли А.Ж. содир этгани аниқланган. Гумонланувчи сифатида тергов органларига жалб этилган А.Ж., фуқаро С.Г.ни Нукус шаҳридаги деҳқон бозорида жойлашган банкоматдан пул ечмоқчи бўлганида унга ёрдам беришини айтиб, банк картаси бошқарувини ўзининг телефон рақамига улаб олиш йўли билан амалга оширгани аниқланган. Қайд этилишича, мазкур ҳолат юзасидан Ўзбекистон Республикаси ЖКнинг 168-моддаси 3-қисми билан жиноят иши қўзғатилиб, А.Ж.нинг содир этилиб фош этилмай қолган бошқа шу турдаги жиноятларга алоқадорлиги юзасидан тезкор-суриштирув ишлари олиб борилмоқда. Қонунга мувофиқ, Ўзбекистон Республикаси Жиноят кодексининг 168-моддаси 3-қисмидаги жиноий хатти-ҳаракатлар учун 5 йилдан 8 йилгача озодликдан маҳрум қилиш жазоси назарда тутилган.