Юртимизда кичик бизнес ва оилавий тадбиркорликни қўллаб-қувватлаш ва ривожлантириш мақсадида 2012 йил 26 апрелда 327-сонли “Оилавий тадбиркорлик тўғрисида”ги қонун имзоланди. Қонуннинг афзаллиги шундаки,  оилавий тадбиркорлик иштирокчилари эр, хотин, уларнинг болалари ва набиралари, ота-онаси, меҳнатга қобилиятли ёшга тўлган бошқа қариндошлари (болалари ва набираларининг эрлари (хотинлари), туғишган ҳамда ўгай ака-ука ва опа-сингиллари, уларнинг эрлари (хотинлари) ҳамда болалари, тоға ва амаки ҳамда амма ва холалари) бўлиши мумкин.

Фақат муомалага лаёқатли 15 ёшдан катта бўлган шахслар оилавий корхона иштирокчилари бўлиши мумкин.

Оилавий тадбиркорлик оила аъзолари томонидан таваккал қилиб ва ўз мулкий жавобгарлиги остида да­ромад (фойда) олиш мақсадида амалга ошириладиган ташаббускорлик фаолиятидир.

Оилавий тадбиркорлик ўз иштирокчиларининг их­тиёрийлигига асосланади.

Оилавий тадбиркорлик юридик шахс ташкил этган ёки ташкил этмаган ҳолда амалга оширилиши мумкин.

Оилавий корхонанинг устав фонди пул маблағлари, қимматли қоғозлар, бошқа мол-мулк, шу жумладан, пул билан баҳоланадиган мулкий ҳуқуқлар ёки ўзга шахсга ўтказиладиган бошқа ҳуқуқлар ҳисобидан шаклланти­рилади.

Ягона уй (квартира) оилавий корхонанинг устав фондига киритилиши мумкин эмас.

Шарипов Хуршид,

Бойсун туман адлия бўлими
Давлат хизматлари маркази
етакчи мутахассиси