Бугун, 23 октябрь куни Миробод туманида бўлиб ўтган саф йиғинидан сўнг Президент маслаҳатчиси Ғофуржон Мирзаев, туман ҳокими Анвар Сайфутдинов, сектор раҳбарлари – туман прокурори Ахрор Ахунов, ИИОФБМ раҳбари Отабек Ходжаев 2-сонли оилавий поликлиника ҳудудида дарахт кўчатини экишди. Бу ҳақда Халқ билан мулоқот телеграм канали маълум қилди. “Яшил макон” умуммиллий акциясининг кузги мавсумига старт берилганидан буён туманда 13 мингдан зиёд кўчатлар экилди. “Азиз ҳамюртлар! Сафимизга қўшилинг ва юртимизни яшил маконга айлантириб, ўзимиз учун, болалар, фарзандлар, келажак авлодлар учун ҳеч бўлмаганда бир сиқим яхшилик, бир мисқол тоза ҳаво, бир чимдим соя яратайлик – ҳар биримиз ҳеч бўлмаганда биттадан кўчат ўтқазиб, парваришлайлик. Бу иш сизу бизнинг қўлимиздан келадиган ва бажаришимиз зарур ва инсоний бурч бўлган ишлардир. Кўчат ўтқазиб, юртни обод қилишдек хайрли ишда чеккада турманг, азиз ватандошлар!”, дейилади хабарда.