– Сайловлар демократиянинг пойдеворларидан бири бўлиб, нафақат фуқароларнинг сиёсий ҳаётда иштирок этишини ва ҳокимиятнинг ҳисобдорлигини кафолатлайди, балки иқтисодий ривожланиш билан ҳам узвий боғлиқдир. Улар иқтисодий сиёсатни шакллантиришда, манбаларни тақсимлашда ва иқтисодий барқарорликни таъминлашда ҳал қилувчи аҳамиятга эга.

Ўзбекистоннинг янги Конституциясида демократик тамойиллар, қонун устуворлиги ва мулк ҳуқуқини мустаҳкамлашга қаратилган жиддий ислоҳотлар назарда тутилган. Ушбу ўзгаришлар хорижий инвестицияларни жалб этишга ижобий таъсир кўрсатиши кутилмоқда. Янги Конституция эркин ва адолатли сайловларни таъминлайдиган ҳамда сиёсий барқарорликка хизмат қиладиган демократик сайлов тизимига содиқликни мустаҳкамлайди. Шунингдек, у қонун устуворлиги тамойилини кучайтиради, барча фуқароларнинг қонун олдида тенглигини кафолатлайди ва суд ҳокимиятининг мустақиллигини оширади.

Бундан ташқари, конституция мулк ҳуқуқини ҳимоя қилишни кучайтиради, инвесторлар учун кўпроқ хавфсизликни таъминлайди ва ҳам ички, ҳам ташқи инвестицияларни рағбатлантиради. Ушбу конституциявий ислоҳотлар Ўзбекистоннинг янада очиқ, башорат қилинадиган ва хавфсиз инвестиция муҳитини яратишга интилаётганидан далолат беради. Бу эса хорижий сармояларни жалб қилиш ва иқтисодий ривожланишни рағбатлантириш учун ғоят муҳимдир.

Сайловлар сиёсий партияларни ўз иқтисодий фаолиятини баҳолашга мажбур қилади ва муқобил стратегияларни таклиф этиш заруриятини туғдиради. Иқтисодий тенденциялар сайловчиларнинг афзалликларига сезиларли таъсир кўрсатади, бу эса сиёсий партияларни аҳолининг иқтисодий кутилмаларига мос келадиган сиёсатни ишлаб чиқиш ва амалга оширишга ундайди.

Хусусан Ўзбекистондаги партиялар аҳолининг даромадини яхшилаш, кам таъминланганларни ва ижтимоий ҳимояга муҳтожларни қўллаб-қувватлаш каби ташаббусларни сайловолди дастурларида илгари суришмоқда. Бу эса одамларнинг сайловларга бўлган эътибори ҳамда масъулиятини, мамлакатда олиб борилаётган ислоҳотларга ишончини оширади.

Ҳасан Али Кулак,

Туркия Президенти ҳузуридаги Туркия фаровонлик жамғармаси ассоциацияси, Истанбул молия марказининг Ҳуқуқий масалалар ва жамоатчилик билан алоқалар бўйича директори