Ўзбекистон элчиси Нодиржон Тургунов Саудиянинг "Saudi Travel Market" компанияси вакили ва таниқли блогер Сиҳам Ол Масъуд билан учрашув ўтказди.

 Унда Ўзбекистон ва Саудия Арабистони ўртасида туризм йўналишида ҳамкорлик алоқаларини жадаллаштириш, Ўзбекистонга келаётган сайёҳлар сонини ошириш, икки давлатда мазкур йўналишда ўтказиладиган йирик тадбирларда соҳа вакилларининг иштирокини таъминлаш масалалари муҳокама қилинди.

Сиҳам Ол Масъуд Ўзбекистон дунёдаги асосий туризм масканларидан бири эканини эътироф этиш баробарида, Саудия туркомпаниялари ўзбек томони билан ҳамкорлик ўрнатишга тайёрлигини билдирди. У, шунингдек, блогерлик фаолияти билан шуғулланишини ҳам айтиб ўтди ва "Инстаграм" саҳифасида 100 минг, "Snapchat" ижтимоий тармоғида 22 минг ҳамда "Google map"да 4 миллионга яқин обуначиси борлигини маълум қилди.

"Уларда асосан саудиялик сайёҳлар ташриф буюраётган мамлакатнинг тарихи, маданияти, миллий таомлари, бозорлари ва меҳмонхоналар ҳақидаги муҳим маълумотлар эълон қилиб борилади", деди у.

Учрашув якунида "Saudi Travel Market" компанияси вакилининг Ўзбекистонга сафарини ташкил этиш ва мамлакатимиз сайёҳлик салоҳиятига бағишланган тадбирларни биргаликда ташкил этиш тўғрисида келишиб олинди.