Тилла тақинчоқларни сотувчилар томонидан қайтариб олинмайди ёки алмаштирилмайди, деб эшитдим, шу тўғрими? Айрим савдо объектларида “Сотилган товарлар қайтариб олинмайди”, деган ёзувларни кўрамиз. Ҳамма сотувчилар ҳам савдо залларига шундай ёзувларни жойлаштириш ҳуқуқига эгами? Сотилган буюмларнинг қандай турлари қайтариб олинмайди ва алмаштириб берилмайди? Тилла тақинчоқлар сотувчи томонидан қайтариб олинмайди. Қонунчиликда қимматбаҳо тошлар ва қимматбаҳо металлардан тайёрланган, ярим қимматбаҳо ва синтетик тошлардан фойдаланиб тайёрланган буюмлар, силлиқланган қимматбаҳо тошлар қайтариб олинмаслиги кўрсатилган. Чакана савдо қоидаларига асосан, қуйидаги товарлар ҳам қайтариб олинмайди ва бошқасига алмаштириб берилмайди:

• Металл, резина, тўқимачилик ва бошқа материаллардан тайёрланган санитария ва гигиена буюмлари, тиббий буюмлар, приборлар ва аппаратлар, оғиз бўшлиғи гигиенаси воситалари, кўзойнак линзалари, болаларни парвариш қилиш буюмлари, дори воситалари;
• Шахсий гигиена буюмлари, яъни тиш чўткалари, тароқлар, соч тўғноғичлар, соч бигудилари, улама сочлар, шиньонлар ва бошқа шу каби товарлар;
• Атторлик-пардоз товарлари;
• Ип-газлама, зиғир толали, ипак, жун ва синтетик газламалар, газлама тусидаги нотўқима материаллардан тайёрланган товарлар — ленталар, жияклар, тўрлар ва бошқалар;
• Кабель маҳсулотлари: симлар, шнурлар, кабеллар;
• Қурилиш ва пардозлаш материаллари: линолеум, плёнка, гилам қопламалар ҳамда метрлаб сотиладиган бошқа товарлар;
• Тикувчилик буюмлари ва трикотаж ички кийимлар, пайпоқ ва қўлқоплар;
• Ошхона идиш-товоқлари ва анжомлари, озиқ-овқат маҳсулотларини сақлаш ва ташиш учун идишлар, ўров материаллари;
• Маиший кимё товарлари: пестицидлар ва агрохимикатлар;
• Мебель гарнитурлари ва тўпламлари;
• Автомобиллар ва мотовелотоварлар, уларга тиркамалар ва номерли агрегатлар; қишлоқ хўжалиги ишлари учун кичик механизация кўчма воситалари; сайр қилиш қайиқлари ва бошқа маиший сузиш воситалари;
• Кафолат муддатлари белгиланган техник жиҳатдан мураккаб маиший товарлар, яъни металл қирқувчи ва ёғочга ишлов берувчи маиший дастгоҳлар; маиший электр машиналари ва маиший электр приборлари; маиший радиоэлектрон аппарат; маиший ҳисоблаш ва кўпайтириш техникаси; фото ва киноаппаратлар; телефон аппаратлари ва факсимиль аппарати; электр мусиқа асбоблари; электрон ўйинчоқлар;
• Ҳайвонлар ва ўсимликлар.

Саволга “Адолат” миллий ҳуқуқий ахборот маркази масъул ходими Шерзод Абдуллаев жавоб берди.