Ўзбекистон Республикасининг «Товар белгилари, хизмат кўрсатиш белгилари ва товар келиб чиққан жой номлари тўғрисида»ги Қонунининг 3-моддасига асосан, товар белгиси ва хизмат кўрсатиш белгиси бу бир юридик ва жисмоний шахслар товарлари ва хизматларини бошқа юридик ва жисмоний шахсларнинг шу турдаги товарларидан фарқлаш учун хизмат қиладиган, белгиланган тартибда рўйхатдан ўтказилган белгилардир.

Товар белгилари якка тартибдаги ва жамоавий бўлиши мумкин.

Алоҳида юридик ёки жисмоний шахсга тегишли товар белгиси якка тартибдаги белги ҳисобланади.

Юридик ва (ёки) жисмоний шахслар бирлашмасининг улар томонидан ишлаб чиқариладиган ва (ёки) реализация қилинадиган, бир хил сифатга ёки бошқа умумий тавсифларга эга бўлган товарларини белгилаш учун мўлжалланган товар белгиси жамоавий белги ҳисобланади.

Тасвирлар, сўзлар, муайян шакл тарзидаги белгилар ва бошқа белгилар ёки уларнинг исталган бир рангдаги ёки турли рангдаги жамлама ифодаси товар белгилари сифатида рўйхатдан ўтказилиши мумкин.

Бренд – бу бошқа сотувчиларнинг товарларидан ажратиб турадиган белги, ном, дизайн ёки бошқа хусусиятлар мажмуидир. Бу компаниянинг стратегияси, логотипи, ранглари, нархлари ва мижозларига тақдим этадиган ўзига хос қийматларни ўз ичига олади, у доимий мижозлар тўплаш ва бозорда ажралиб туришга ёрдам беради.

Товар белгиси ва бренд бу икки атама ҳам маълум бир товарнинг бошқаларидан ажралиб турувчи белгисини англатиши жиҳатидан бир хил тушунча ҳисобланади, аммо уларни ажратиб турадиган жиҳати ҳам мавжуд бўлиб бу — ҳуқуқий ҳимоя ҳисобланади. Товар белгиси бу юқорида таъкидлаганимиздек, белгиланган тартибда рўйхатдан ўтказилган ва ҳуқуқий ҳимоя остидаги белги ҳисобланади. Бренд эса, товарнинг яратилган белгиси бўлиб, фақатгина рўйхатдан ўтмаган ҳамда ҳуқуқий ҳимояга эга бўлмаган шакли ҳисобланади.

Бренд компанияни виждонсиз рақобатчилардан ҳимоя қилади, қўшимча даромад олиш имконини беради. Бренд маҳсулотларни қалбакилаштиришдан ҳимоя қилиш имконини беради. Бундан ташқари, қадоқлаш, теглар ва бошқа шаклларда ишлатилиши мумкин. Бунинг учун турли хил ҳимоя усуллари қўлланилади. Брендни рўйхатдан ўтказиш унинг эгаси учун юқоридаги каби жуда кўп афзалликларга эга.

Худойберди Раҳимов,
"Адолат" МҲАМ ходими