Жорий йил 15-июлдан эътиборан 2026—2027-ўқув йили учун талабаларнинг ўқишини давлат олий таълим ташкилотларига кўчириш ва қайта тиклаш бўйича онлайн аризалар қабули старт олди. Олий таълим, фан ва инновациялар вазирлиги томонидан маълум қилинишича, жараён 5 август кунига қадар (шу куни ҳам) давом этади.

Жорий йилда татбиқ этилган янги тартибга кўра, ҳужжат топшириш жараёни сезиларли даражада соддалашди. Умумтаълим фанлари ва чет тили бўйича миллий сертификатлар ахборот тизими орқали автоматик тарзда аниқланади. Талаба тизимга юклаб ўтириши шарт эмас.

Халқаро сертификатларни эса талабгор бошқа ҳужжатлар билан бирга электрон шаклда юклаши талаб этилади.

Қаерга мурожаат қилиш керак?

Ўқишни кўчирмоқчи бўлган талабалар 2 та порталдан фойдаланади:

▪️transfer.edu.uz — республика доирасида бир давлат ОТМдан бошқасига (ёки бир ОТМ ичида) ўқишни кўчириш ҳамда ўқишни қайта тиклаш учун.

▪️my.uzbmb.uz — хорижий ва нодавлат ОТМдан давлат олий таълим ташкилотларининг мос ва турдош йўналишларига кўчириш учун.

Кимларга рухсат берилади?

Республика ичидаги ОТМ ўртасида ўқишни кўчириш барча учун очиқ эмас. Президент қарорига мувофиқ, бунга фақат икки ҳолатда рухсат берилади:

▪️Оила қуриш: талаба оила қуриши муносабати билан турмуш ўртоғи доимий яшайдиган ҳудуддаги олий таълим муассасасига ўқишини кўчириш учун мурожаат қилганда;

 

▪️Иш жойининг ўзгариши: давлат органларининг ходимлари иш жойи ўзгарган тақдирда унинг турмуш ўртоғи ёки вояга етмаган фарзанди ўқишини кўчириш учун мурожаат қилганда, тегишли вазирлик (идора) раҳбарининг тавсияси асосида.

Қандай ҳужжатлар керак?

Давлат ёки хусусий олий таълим муассасасидан республикадаги бошқа давлат ОТМга кўчириш жараёнида тизимга қуйидаги ҳужжатларнинг электрон нусхасини (ПДФ ёки сифатли фотосурат) юклаш талаб қилинади:

▪️Академик маълумотнома (транскрипт): ўқиётган олий таълим ташкилотидан олинган, фанлар ўзлаштирилганлигини тасдиқловчи ҳужжат.

▪️ Рейтинг дафтарчаси ёки белгиланган намунадаги маълумотнома: фанлар бўйича баҳоларингиз кўрсатилган бўлиши лозим.

 

Узрли сабабни тасдиқловчи ҳужжатлар:

▪️Агар сабаб сифатида “оила қуриш муносабати билан” бандини танланса Никоҳ тузилганлиги тўғрисидаги гувоҳнома ва турмуш ўртоғининг доимий яшаш жойи бўйича маълумотнома.

▪️Иш жойи ўзгарганда: иш жойидан маълумотнома ва тегишли вазирлик/идора тавсияси.

 

Хорижий ёки нодавлат олий таълим ташкилотларидан давлат ОТМга ўқишни кўчириш тартиби фарқ қилади. Бу ерда асосий эътибор талабгорнинг академик салоҳиятига қаратилади. Шу сабабли, талабгор академик салоҳиятини тасдиқловчи халқаро сертификатларини тизимга юклаши керак (миллий сертификатлар ахборот тизими орқали автоматик тарзда аниқланади).

Ўқишни тиклашда талаба илгари қайси асосга кўра четлаштирилганини (масалан, ўз хоҳишига кўра, академик қарздорлик ёки бошқа сабаблар) тасдиқловчи архив маълумотномаси ёки буйруқдан кўчирма талаб қилинади.

Ўқиш тиклангандан сўнг, жорий ўқув дастуридан келиб чиқиб, фанлараро “академик фарқ”ни топшириш талаб этилиши мумкин. Шу боис, аризани топширишдан олдин ўқиган ОТМингиздан ўқув дастурингиздаги фанлар кетма-кетлигини аниқлаштириб олиш тавсия этилади.