Ҳуқуқ
01.08.2024
740
Ўқитувчилар йилига неча ставка ишлаши мумкин? Дарс соати қандай мезонлар асосида тақсимланади? Ўқитувчи ўзининг дарс соатини бошқа ўқитувчига бериши мумкинми?. Hudud24.uz ушбу мақолада шу каби саволларга жавоб беради.
1. Мактабдаги дарс соатлари қачон тасдиқланади?
Мактабларда ҳар йили 10 сентябргача барча фанлар бўйича жами дарс соатлари шакллантирилади.
Бунда таълим қорақалпоқ, рус, қозоқ, тожик, қирғиз, туркман тилларида олиб бориладиган мактабларда ўқиш, она тили ва адабиёт фанлари бўйича дарс соатлари ўқувчилар таълим олишни хоҳлаган тилдан келиб чиқиб, ҳудудий мактабгача ва мактаб таълими тузилмалари билан келишилган ҳолда шакллантирилади.
Шакллантирилган дарс соатлари мактабнинг педагогик кенгаши томонидан 2 иш куни ичида кўриб чиқилиб, ҳар йили 15 сентябрга қадар ўқитувчилар ўртасида тақсимланади.
2. Мактаб ўқитувчиларига дарс соатлари қайси мезонлар асосида тақсимланади?
Мактабларда дарс соатлари педагогик кенгаши томонидан ҳар йили 15 сентябргача ўқитувчиларнинг қуйидаги кўрсаткичларига кўра кетма-кетлик асосида тақсимланади:
халқаро олимпиада ғолибларини тайёрлаган ўқитувчилар;
ўқитувчи бўлиб ишлаётган халқаро олимпиадалар ғолиблари;
чет тили ва STEAM фанларидан халқаро сертификатга эга ўқитувчилар (TESOL Level 5, CEFR B2, IELTS 6 ва ундан юқори);
TOP-1000 университетларни битирган ўқитувчилар;
асосий олимпиадаларнинг республика ғолибларини тайёрлаган ўқитувчилар;
ўқитувчи бўлиб ишлаётган асосий олимпиадаларнинг республика ғолиблари;
республика босқичидаги кўрик танловларда (йил ўқитувчиси) совринли ўринларга эга бўлган ўқитувчилар;
олий малака тоифасига эга ўқитувчилар;
1-малака тоифасига эга ўқитувчилар;
асосий олимпиадаларнинг вилоят ва туман ғолибларининг ўқитувчилари;
2-малака тоифага эга ўқитувчилар;
педагогик йўналиш бўйича магистр даражасига эга ўқитувчилар;
ўз фанидан ўтказилган назарий ва амалий синовлар натижаси бўйича аъло баҳоларга эга ўқитувчилар;
олий маълумотли тоифасиз ўқитувчилар;
қайта тайёрлаш бўйича дипломга эга ўқитувчилар;
ОТМнинг педагогик йўналиш бўйича битирувчи босқич талабалари;
педагогик йўналиш бўйича хорижий давлатларнинг олийгоҳларини битирган, бироқ дипломи тан олинмаган ўқитувчилар;
олий маълумотли ўқитувчилар билан таъминлангунига қадар ўрта махсус, профессионал маълумотга эга ўқитувчилар;
олий маълумотли ўқитувчилар билан таъминлангунига қадар умумтаълим муассасасининг тегишли мутахассислиги бўйича раҳбар ходимлари.
3. Ўқитувчиларнинг максимал дарс соати қанча?
Ўқитувчиларга йиллик бир ярим ставкадан (йиллик 2 322 соат) ортиқ дарс соатлари белгиланмайди.
4. Кимларга максимал дарс соатлари берилади?
Юқоридаги кўрсаткичлар кетма-кетлик асосида устунликка эга бўлган ўқитувчиларга дарс соатларининг максимал миқдорлари белгиланиши тавсия этилади.
5. Дарс соатлари қайта тақсимланиши мумкинми?
Ҳа, мумкин. Дарс соатларини қайта тақсимлаш педагогик кенгаш томонидан амалга оширилади.
Педагогик кенгаш томонидан тақсимланган дарс соатлари ҳар йили 17 сентябргача махсус электрон дастурга киритилади.
Синф сонининг кўпайиши ёки камайиши оқибатида киритиладиган ўзгартиришлар тегишли ҳудудий мактабгача ва мактаб таълими бўлинмалари ва ҳудудий иқтисодиёт ва молия органлари томонидан қайта тасдиқланиши лозим.
6. Кўрсаткичи юқори ўқитувчининг дарс соатини бошқа ўқитувчига берса бўладими?
Юқоридаги кўрсаткичлар кетма-кетлик асосида устунликка эга бўлган ўқитувчиларга дарс соатларининг максимал миқдорларини бериш тавсия этилади.
Максимал дарс соати олиш имкониятига эга ўқитувчининг ёзма розилиги билан унга ажратилиши мумкин бўлган дарс соатлари бошқа ўқитувчиларга берилиши мумкин.
7. Ўқитувчилар кўрсаткичи тенг бўлганда дарс соати қандай тақсимланади?
Ўқитувчида юқоридаги кўрсаткичларнинг бир нечтасига эга бўлганда, кўрсаткичларнинг энг устувори инобатга олинади.
Айнан бир хил кўрсаткичлар мавжуд бўлган бир нечта ўқитувчилар ўртасида дарс соатлари тенг тақсимланади.
8. «Декрет»дан қайтганларга неча соат дарс берилади?
Ҳомиладорлик ва туғиш таътили ҳамда бола парваришидан қайтган ўқитувчиларга, ишловчи пенционерларга дарс соатлари юқоридаги кўрсаткичлар кетма-кетлиги асосида тақсимланади.
Дилмурод Ражабоев
“Hudud24.uz” колумнисти
Улашиш:
Бошқалар
Боғча директорлари учун ўринбосарлар, 20 фоизлик устама, мобил малака ошириш хизматлари ва имтиёзлар
Ўзбекистон Республикаси Президентининг «Мактабгача таълим сифати ва самарадорлигини янада ошириш бўйича қўшимча чора-тадбирлар тўғрисида»ги фармони қабул қилинди.
Меҳнат муносабатларида камситилиш ҳолати нима ва ундан шикоят қилиш тартиби қандай?
Ўзбекистон Республикасининг барча фуқаролари меҳнат ҳуқуқларига эга бўлиш ва улардан фойдаланишда тенг имкониятларга эгадирлар. Бу Меҳнат кодексининг 4-моддаси биринчи қисмида назарда тутилган.
Транспорт воситаларини бошқаришни ўргатиш
Транспорт воситасини бошқаришни ўргатаётган вақтда ўргатувчида тегишли тоифадаги транспорт воситасини бошқариш ҳуқуқини берувчи ҳайдовчилик гувоҳномаси бўлиши шарт.
Тазйиқ ва зўравонликдан жабрланган хотин-қизларга ҳимоя ордерини бериш
Ҳимоя ордери ички ишлар органларининг таянч пункти профилактика (катта) инспектори томонидан белгиланган схемага мувофиқ берилади.