Сўнгги йилларда Ўзбекистон ва Франция ўртасидаги ҳамкорлик барча йўналишларда фаоллашиб, очиқ ва ишончли мулоқотга асосланган тарзда ривожланмоқда. Франция Ўзбекистон учун иқтисодиёт, сармоя, молиявий ва техник ҳамкорлик соҳаларидаги муҳим шерик ҳисобланади.

Жорий йил 11-13 март кунлари Ўзбекистон Республикаси Президенти Ш.Мирзиёевнинг Франция Республикасига давлат ташрифи амалга оширилди. Мазкур ташриф Ўзбекистон-Франция ўртасидаги ҳамкорликни янги босқичга олиб чиқиш ва янги лойиҳаларни амалга оширишда муҳим тарихий воқеа бўлди.

Ташриф доирасида эришилган энг муҳим натижалардан бири – Стратегик шериклик муносабатларини ўрнатиш тўғрисидаги қўшма декларация қабул қилиниши бўлди. Бу ҳужжат Ўзбекистон ва Франция ўртасидаги ҳамкорликни стратегик даражага олиб чиқиш, турли соҳалардаги шерикликни узоқ муддатли асосда мустаҳкамлаш ва ўзаро манфаатли алоқаларни кенгайтиришга хизмат қилади.

Ўзбекистон ва Франция ўртасидаги иқтисодий ҳамкорликнинг янги босқичини белгилаб берган муҳим воқеалардан бири – Инвестиция ва инновация соҳаларида ҳамкорлик дастурининг қабул қилиниши бўлди. Умумий қиймати 6,5 миллиард евро бўлган лойиҳаларни ўз ичига олган бу дастур Франциянинг етакчи компаниялари билан ҳамкорликни кенгайтиришни назарда тутади.

Таъкидлаш жоизки, Ўзбекистон ўзининг географик жойлашуви туфайли тарихан Шарқ ва Ғарбни боғловчи муҳим ҳудуд ҳисобланган. Буюк Ипак йўли даврида Франциядан чиққан сайёҳлар, савдогарлар ва дипломатлар Марказий Осиёга ташриф буюриб, бу ердаги маданият, санъат ва илм-фан билан танишганлар. Франция ва Ўзбекистон ўртасидаги маданий ҳамкорлик бугунги кунда ҳам фаол давом этмоқда. Француз сайёҳлари ва тадқиқотчилари ҳозирги кунда ҳам Ўзбекистоннинг бой тарихий ва маданий мероси билан қизиқишмоқда.

Сўнгги йилларда икки мамлакат ўртасидаги маданий алоқалар янада фаоллашди. 2022-2023 йилларда Париждаги Лувр музейи ва Араб дунёси институтида Ўзбекистоннинг бой маданий меросига бағишланган кўргазмалар ташкил этилди. Бу каби лойиҳалар нафақат маданий алмашинув, балки халқлар ўртасидаги ўзаро ҳурматни янада мустаҳкамлайди.

Хулоса қилиб айтганда Президент Ш.Мирзиёевнинг Францияга амалга оширган давлат ташрифи икки томонлама муносабатларда янги саҳифа очди. Бу ташриф Ўзбекистон-Франция ҳамкорлигини сифат жиҳатидан янги босқичга олиб чиқди. Ҳар икки давлат ўртасидаги иқтисодий, маданий, таълим ва бошқа соҳаларидаги келишувлар икки томонлама алоқаларни янада ривожлантиришда муҳим омил бўлди.

Феруза Муҳитдинова,
ТДЮУ профессори, юридик фанлар доктори