Ўзбекистон Маданият ва санъатни ривожлантириш жамғармаси ташаббуси билан 21 та бино модернизм даври объекти мақомини олди ва миллий маданий мерос объектлари рўйхатига киритилди. 

Қайд этилишича, Вазирлар Маҳкамасининг 2024 йил 22 апрелда “Моддий маданий мерос объектларининг миллий рўйхатига ўзгартириш ва қўшимчалар киритиш тўғрисида”ги қарори қабул қилинди.

Ҳужжат Ўзбекистон халқининг миллий бойлиги ҳисобланган модернизм даври моддий маданий меросини муҳофаза қилиш, асраб-авайлаш ва улардан фойдаланиш устидан давлат назоратини амалга ошириш, ёдгорликларни тизимлаштириш, рўйхатини тузиш, тарихийлигини сақлаш ҳамда аҳамиятини оширишни мақсад қилган. 

Биринчи босқичда рўйхатга 10 та янги объект киритилди:
• “Қуёш гелиокомплекси”;
• “Ўзбекистон” меҳмонхонаси;
• Давлат санъат музейи;
• Тошкент телеминораси;
• “Эски жува” деҳқон бозорининг 8 та мовий гумбази;
• “Шодлик” меҳмонхонаси, “Илҳом” театри;
• “Космонавтлар” метро бекати;
• Residense Park меҳмонхонаси биноси;
• Авиация ишлаб чиқарувчилар саройи;
• Кўкрак қафаси жарроҳлик илмий-тадқиқот институти.

Рўйхатга киритилган 10 та объект ҳолатига қўшимчалар киритилди:
• Ўзбекистон Рассомлар уюшмаси кўргазмалар павилони;
• Туркистон концерт зали биноси ва ёзги майдони;
• Тошкент телеминораси;
• 17 қаватли монолит турар-жой биноси (“Марварид”);
• Aлишер Навоий номидаги санъат саройи биноси;
• Тошкент давлат сирки биноси;
• Халқлар дўстлиги санъати саройи биноси;
• Ўзбекистон тарихи давлат музейи биноси;
• Ўзбекистон амалий санъат музейи;
• “Мовий гумбазлар” кафеси.

Жамғарма, шунингдек, юқорида қайд этилган модернизм услубидаги биноларни ЮНЕСКОнинг Бутунжаҳон мероси рўйхатига киритиш учун ҳужжат тайёрлаяпти. 

Бундан ташқари, мазкур қарор асосида Маданий мерос агентлиги Иқтисодиёт ва молия вазирлиги ҳузуридаги Кадастр агентлиги, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан ҳамкорликда модернизм даври объектларини белгиланган тартибда давлат кадастрига киритиш чораларини ишлаб чиқади.