Кореянинг илғор IT компанияси Ўзбекистонда IT таълим экотизимини ривожлантиради.

Рақамли Технологиялар Вазири ўринбосари Рустам Каримжоновнинг маълум қилишича, “Hancom academy” мамлакатимиз бўйлаб IT соҳасига қизиқиши юқори бўлган иқтидорли ёшларни саралаб уларни Data science, Artificial and Cloud technologies, Software engineering каби келажак касбларига ўқитиш дастурини йўлга қўяди.

Шунингдек, “Hancom Academy” томонидан ишлаб чиқилган алоҳида ўқув дастури бўйича маҳаллий IT менторларни тайёрлаш тизими йўлга қўйилади.

Ўқув дастури Ўзбекистон ва жаҳонда талаб юқори бўлган ва юқори маошга эга касбларга ёшларни ўргатишга мўлжалланган.

Дастур битирувчилари келажакда юқори даромад касб эгаси бўлиш ҳамда чет элга IT хизматлар экспорти билан шуғулланиш имкониятига эга бўлишади.

Маълумот учун, Hancom Group 1990 йил ташкил этилган бўлиб, Корея Республикасида Microsoft Office ўрнини боса оладиган Hangul Korean Word дастурий таъминотини яратиш билан Кореяда танилган компаниядир.

Hancom Groupнинг сунъий интеллект, дрон ва бошқа илғор технологияларни ўқитишга ихтисослашган онлайн таълим платформаси эга йирик IT академия — Hancom academy шўба ташкилоти мавжуд.

Ушбу IT академия Корея Республикасида йирик корхоналар, жумладан Samsung Electronics, SK Telecom, KT, LG Electronics ходимлари малакасини ошириш, давлат хизматчилари малакасини ошириш билан шуғулланади, ҳамда йирик университетлар билан ҳамкорлик қилади.