Алимент ундиришда ҳисобга олинадиган даромадлар

Оила кодексининг 104-моддасига мувофиқ, алимент Ўзбекистон Республикаси ҳудудида ва унинг ташқарисида пул ёки натура тарзида олинган барча турдаги даромадлардан ушлаб қолинади.

Чет эл валютасида олинадиган даромадлар алимент унди риладиган кунда амалда бўлган Ўзбекистон Республикаси Марказий банкининг расмий курси бўйича сўмларда ҳисобланади.

Ота-онадан болалар таъминоти учун ундириладиган алимент қайси манбалардан ушлаб қолиниши масаласини аниқлаш ҳам муҳим аҳамиятга эга. Шу боис ушбу моддада бундай манбаларнинг турлари белгиланган. Унга кўра алимент нафақат Ўзбекистон Республикаси ҳудудида, балки унинг ташқарисидаги даромадлардан ҳам ушлаб қолинади. Бунда даромаднинг пул ёки натура шаклида  эканлиги аҳамият касб этмайди.

Агар алимент тўловчи (ота-она)нинг даромади чет эл валютасида бўлса, алимент миқдори қонунчиликда белгиланган тартибга кўра, алимент ундириладиган кунда амалда бўлган Ўзбекистон Республикаси Марказий банкининг расмий курси бўйича сўмларда ҳисобланади.

Алимент миқдорини камайтириш ёки алимент тўлашдан озод қилиш

Алимент тўлаётган ота-онанинг бошқа вояга етмаган болалари бўлиб, ундан қонунда белгиланган миқдорда алимент ундирилганда ўша болалар алимент олаётган болаларга нисбатан моддий жиҳатдан камроқ таъминланиб қоладиган бўлса, шунингдек алимент тўлаётган ота (она) ногиронлиги бўлган шахс бўлиб, моддий жиҳатдан қийналиб келаётган бўлса ёки алимент олаётган шахс мустақил даромадга эга бўлган тақдирда, алимент миқдори суд томонидан камайтирилиши мумкин.

Агар вояга етмаган бола давлат ёки нодавлат муассасаларининг тўлиқ таъминотида бўлса, суд алимент тўлаётган ота ёки онанинг моддий аҳволини ҳисобга олиб, тўланаётган алимент миқдорини камайтириш ёки уни алимент тўлашдан озод қилиш ҳақида ҳал қилув қарори чиқариши мумкин.

Алимент миқдорини камайтириш ёки уни тўлашдан озод қилиш учун асос бўлган ҳолатлар тугаганда манфаатдор тараф алимент қонунда белгиланган миқдорда ундирилишини талаб қилиб, судга мурожаат этишга ҳақли.