Бугунги кунда рақамли технологиялар ҳаётимизнинг барча жабҳаларига кириб келмоқда. Ҳуқуқий хизматлар соҳаси ҳам бундан мустасно эмас. Yurxizmat.uz платформаси фуқаролар ва тадбиркорларга ҳуқуқий ҳужжатларни мустақил равишда тайёрлаш имкониятини тақдим этувчи ана шундай инновацион ечимлардан биридир.

Ўз-ўзига ҳуқуқий хизмат кўрсатиш – “Legal Tech” электрон ахборот тизими — Президентимизнинг 2020 йил 5 октябрдаги “Рақамли Ўзбекистон – 2030” Стратегиясини тасдиқлаш ва уни самарали амалга ошириш чора-тадбирлари тўғрисидаги Фармонига асосан жорий этилган. Ахборот тизими “Yurxizmat.uz” доменида 2021 йил 1 апрелдан тест режимида ишга туширилган.

“Legal Tech” электрон ахборот тизими (Yurxizmat.uz) кичик ва ўрта бизнес вакиллари, аҳолининг кам таъминланган қатламларига, шунингдек бошқа фуқаро ва ташкилотларга юристлар (адвокат) иштирокисиз ҳуқуқий ҳужжатларни (аризалар, шартномалар, ташкилотларниннг таъсис ҳужжатлари в.ҳ.) автоматлаштирилган ҳолда (коньструктор) электрон шаклда тайёрлаш имкониятини беради.

Иқтисодий жиҳатдан ривожланган хорижий давлатларнинг ушбу соҳадаги ижобий тажрибасига кўра, фойдаланувчилар томонидан юристлар (адвокатлар) иштирокисиз ҳуқуқий ҳужжатларни тайёрлаш учун “Legal Tech” электрон ахборот тизимлари кенг фойдаланиб келинмоқда.

Платформа фойдаланувчиларга қуйидаги турдаги ҳуқуқий ҳужжатларни онлайн тарзда тайёрлаш имконини беради:

* судга оид ҳужжатлар;

* шартномалар, келишув, битимлар, ишончномалар;

* корпоратив ҳужжатлар;

* шахсий таркибга оид ҳужжатлар;

* ариза, илтимосномалар намуналари;

* нотариал тасдиқланадиган ҳужжатлар.

Фойдаланувчилар керакли ҳужжатни танлаб, махсус шаклларни тўлдириш орқали ҳужжатни тайёрлашлари ва уни электрон ёки босма шаклда юклаб олишлари мумкин.

Yurxizmat.uz тизимининг ишга туширилиши нафақат фойдаланувчилар, балки давлат органлари учун ҳам катта қулайлик яратади. Илгари Ўзбекистонда ҳуқуқий ҳужжатларнинг бепул ва очиқ базаси мавжуд эмас эди, бу эса ҳужжатларни тайёрлаш жараёнида ортиқча вақт ва ресурс сарфланишига олиб келарди. Эндиликда интернетдан фойдаланиш имкониятига эга бўлган ҳар бир шахс ушбу тизим орқали ҳужжатларни тўғридан-тўғри ва мустақил равишда расмийлаштириши мумкин.

Платформанинг афзалликлари

— вақт ва маблағни тежаш: Yurxizmat.uz орқали фойдаланувчилар ҳуқуқий ҳужжатларни юрист ёки адвокатларнинг ёрдамисиз, мустақил равишда тайёрлашлари мумкин, бу эса вақт ва маблағни сезиларли даражада тежайди;

— қулайлик ва фойдаланиш осонлиги: платформанинг интерфейси ва аниқ йўриқномалари фойдаланувчиларга ҳужжатларни тез ва хатосиз тўлдириш имконини беради;

— ҳуқуқий саводхонликни ошириш: платформа орқали фойдаланувчилар турли ҳуқуқий ҳужжатлар билан танишиб, уларнинг тузилиши ва мазмунини тушунишлари мумкин, бу эса умумий ҳуқуқий саводхонликни оширишга хизмат қилади.

Мазкур ахборот тизимидан самарали фойдаланиш, шунингдек, фуқароларнинг ҳуқуқий ҳужжатлар билан ишлаш кўникмасини ошириш мақсадида қуйида айрим ҳужжат намуналарини тақдим этамиз.

Автотранспорт воситасини қисқа муддатли ижарага бериш шартномаси (https://yurxizmat.uz/oz/document/2548);

Бино иншоотнинг олди сотди шартномаси
(https://yurxizmat.uz/oz/document/1257);

Муаллифлик ҳақини олиш тўғрисида ариза
(https://yurxizmat.uz/oz/document/630);

Махфий васиятномани очиш ва ошкор қилиш баённомаси
(https://yurxizmat.uz/oz/document/576);

Маъсулияти чекланган жамият устави
(https://yurxizmat.uz/oz/document/676).