Меҳнат кодексининг 295-моддасига кўра,  меҳнат интизоми барча ходимларнинг меҳнат тўғрисидаги қонунчиликка, жамоа келишувларига, жамоа шартномасига, шунингдек ички меҳнат тартиби қоидаларига, бошқа ички ҳужжатларга ва меҳнат шартномасига мувофиқ белгиланган хулқ-атвор қоидаларига мажбурий бўйсунишидир.

Иш берувчи меҳнат тўғрисидаги қонунчиликка ва меҳнат ҳақидаги бошқа ҳуқуқий ҳужжатларга, меҳнат шартномасига мувофиқ ходимларнинг меҳнат интизомига риоя етиши учун зарур шарт-шароитлар яратиши шарт.

Меҳнат интизоми нормал иш учун зарур ижтимоий-иқтисодий ва ташкилий-техник шарт-шароитларни яратиш, ҳалол меҳнати учун рағбатлантириш ва мукофотлаш усуллари, меҳнат (лавозим) мажбуриятларини бузган ходимларга нисбатан жазо чораларини қўллаш орқали таъминланади.

Демак, меҳнат интизоми таъминлашнинг қуйидаги 3 та усули мавжуд:

1. Нормал иш учун зарур ижтимоий-иқтисодий ва ташкилий-техник шарт-шароитларни яратиш.

2. Ҳалол меҳнат учун рағбатлантириш ва мукофотлаш.

3. Меҳнат (лавозим) мажбуриятларини бузган ходимларга нисбатан жазо чораларини қўллаш.

Нормал иш учун зарур ижтимоий-иқтисодий ва ташкилий-техник шарт-шароитларни яратиб бериш меҳнат интизомини таъминлашнинг асосий шарти бўлиб ҳисобланади. Иш берувчи ходимларни меҳнат мажбуриятларини амалга ошириш имконини берадиган асбоб-ускуналар, техник воситалар, ҳужжатлар билан таъминлаши, меҳнат муҳофазаси ва гигиенаси, меҳнат хавфсизлиги билан таъминлаши, ходимларга иш ҳақини ўз вақтида ва тўла ҳажмда тўлаш ишлаш учун зарур ташкилий ва иқтисодий шароитларни яратишга киради. Меҳнат интизомининг ҳолати иш берувчи томонидан айнан ушбу мажбуриятларни бажарилишига боғлиқдир. Нормал тарзда ишлашга зарур ташкилий ва иқтисодий шароитларни яратиб бериш кейинчалик ходимларни рағбатлантириш ёки уларга нисбатан интизомий жазо чораларини қўллаш имконини беради. Интизомий жазо чоралари сифатида, ҳайфсан, жарима, меҳнат шартномасини бекор қилиш каби жазолар қўлланилиши мумкин.