Сув ҳавзаларида чўмилиш мавсуми 15 майдан 15 сентябргача деб белгиланган. Чўмилиш мавсуми бошланиши билан турли бахтсиз ҳодиса ва ҳалокатлар тўғрисида хабарлар ҳам тарқалмоқда. Hudud24.uz қонунчиликка мувофиқ, бу давр мобайнида аҳоли хавфсизлигини таъминлаш учун давлат органлари томонидан кўрилиши шарт бўлган хавфсизлик чораларини эслатади.

Чўмилиш мавсумида сув ҳавзаларида (кўллар, дарёлар, денгизлар, сув омборлари, каналлар ва сув жамланадиган табиий шаклланган ёки сунъий барпо этилган жойлар) аҳолининг хавфсизлигини таъминлаш бўйича ҳар йили алоҳида чора-тадбирлар кўрилиши керак. Хусусан:

1. Бахтсиз ҳодисалар юз берадиган жойларда чўмилиш тақиқланишига оид белги ўрнатилиши лозим.

Сувда бахтсиз ҳодисалар (одамлар ўлими) тез-тез рўй бериб турадиган жойлар аниқланиб ва маҳаллий аҳоли ва дам олувчилар ўртасида тушунтириш ишлари олиб бориш шарти билан қирғоқ бўйлаб чўмилишни тақиқловчи белгилар ўрнатилади.

Масъуллар: ҳокимликлар, маҳалла ва Фавқулодда вазиятлар вазирлиги

2. Ташкил қилинган пляжлар хавфсизлик талаблари бўйича ўрганилади.

Дам олиш ҳудудлари, санаторийлар ва болалар соғломлаштириш оромгоҳлари, пляжлар ва ҳовузларда пляжларни ташкил этиш, жиҳозлаш ва улардан фойдаланишнинг белгиланган талабларига мувофиқлиги юзасидан ўрганиш ўтказилади.

Ички ишлар органлари, ҳокимликлар, маҳалла, бошқа манфаатдор ташкилотлар вакилларидан иборат бўлган ишчи гуруҳлар томонидан чўмилишга мўлжалланмаган ва чўмилиш ҳамда кичик ўлчамли кемалар ҳаракати тақиқланган жойларнинг мониторинги олиб борилади.

Масъуллар: Фавқулодда вазиятлар вазирлиги, ҳокимликлар, маҳаллалар, Соғлиқни сақлаш вазирлиги, Ички ишлар вазирлиги

3. Хавфсизлик бўйича штаблар ташкил қилинади.

Ички ишлар органлари, ҳокимликлар, маҳаллалар, соғлиқни сақлаш туман бўлимлари ходимларидан иборат таркибда аҳоли хавфсизлигини таъминлаш бўйича сувда оммавий дам олинадиган жойларда штаблар ташкил этилади.

Аҳоли томонидан кичик ўлчамли кемалардан фойдаланишда хавфсизлик қоидалари ва чораларига риоя этилиши юзасидан қатъий назорат ўрнатилади.

Масъуллар: ҳокимликлар, Экология вазирлиги, Фавқулодда вазиятлар вазирлиги, Ички ишлар вазирлиги

4. Хавфсизликка риоя қилиш бўйича тарғибот ишлари олиб борилади.

Маҳаллий оммавий ахборот воситаларида фуқароларнинг сувда хавфсиз хулқ-атвори қоидалари тўғрисидаги видеосюжетлар, мақолалар, телекўрсатувлар ва радио эшиттиришлар тайёрлаб тарқатилади.

Кема эгалари ва кема ҳайдаш бўйича йўриқчилар ўртасида кичик ўлчамли кемалардан хавфсиз фойдаланиш қоидалари бўйича эслатмалар тарқатилади.

Пляжларда ва сувда оммавий дам олишнинг бошқа жойларида дам олувчилар томонидан хавфсизлик чораларига риоя этиш қоидалари бўйича эслатмалар ўрнатилади.

Масъуллар: МТРК, ҳокимликлар, Экология вазирлиги, Фавқулодда вазиятлар вазирлиги, Ички ишлар вазирлиги.

5. Тиббий ва қутқарув постлари ташкил қилинади.

Сувда оммавий дам олиш жойларида қутқарув постлари ва тиббий ёрдам постлари ташкил этилади.

Пляж зоналаридаги тиббий ёрдам постлари малакали ходимлар ва дастлабки тиббий ёрдамнинг зарур воситалари билан таъминланади.

Сувда касаллик келтириб чиқарувчи микроблар мавжудлиги юзасидан даврий назорат текширишлари ўтказилади.

Пляжларда ва сувда оммавий дам олинадиган жойларда хавфсизлик чоралари бўйича маълумотлар берувчи плакатлар ўрнатилади.

Масъуллар: сувда оммавий дам олиш жойларидан фойдаланувчи ташкилотлар, Соғлиқни сақлаш вазирлиги, ҳокимликлар.

Дилмурод Ражабоев,

ҳуқуқшунос, Hudud24.uz колумнисти