Тошкент шаҳар судининг “Док-1 Макс” иши бўйича бошланган суд мажлиси давом этди. Суд жараёни судья Мусо Юсупов раислигида бўлиб ўтмоқда. Бу галги мажлисда судланувчи С.Саидовнинг кўрсатмалари эшитилди. У Ўзбекистон Республикаси Соғлиқни сақлаш вазирлиги ҳузуридаги “Дори воситалари, тиббий буюмлар ва тиббий техника экспертизаси ва стандартлаштириш давлат маркази” давлат унитар корхонаси Фармакология қўмитасида масъул лавозимда ишлаган. Суд жараёнида, берган кўрсатмаларидан келиб чиқиб, адвокатлар ва бошқа судланувчилар унга дори воситаларининг клиник текширувлари истеъмолга рухсат берилишига оид саволлар билан мурожаат қилишди. Айтиш мумкинки, “Док-1 Макс” дори воситасининг истеъмоли туфайли бир эмас, нақ 65 нафар ёш болалар заҳарланиб, ҳаётдан кўз юмган. Аммо суд мажлисида судланувчилар айбни, жавобгарликни бир-бирларига ағдаришга уринишмоқда. Cуд мажлисида раиси Самарқанд вилоят соғлиқни сақлаш бошқармаси бошлиғи Д.Ж.га нисбатан қамоққа олиш эҳтиёт чораси қўлланилганини маълум қилди. Тергов-суриштирув жараёнида аниқланишича, вилоят Болалар кўп тармоқли тиббиёт маркази бош шифокори М.Азизов бошқарма раҳбариятини “Док-1 Макс”нинг заҳарли экани ҳақида огоҳлантирилган. Аммо бунга жавобан ҳеч қандай чора кўрилмаган. Суд мажлиси келаси ҳафта ўз ишини давом эттиради.