Бугун, 1 ноябрь куни Тошкент шаҳар судида “Dok-1 Maks” иши бўйича навбатдаги суд мажлиси бўлиб ўтди. Суд жараёнига судья Мусо Юсупов раислик қилди. Бу галги суд мажлисида адвокатлардан бири ҳолатга янада ойдинлик киритиш мақсадида вафот этган болаларнинг мурдасини эксгумация қилиш, уларда патологоанатом экспертизаси ўтказиш масаласини ҳал қилиш юзасидан илтимоснома киритди. Маълумот ўрнида, Эксгумация мурдани кўздан кечириш ва экспертиза ўтказиш зарурияти туғилганда уни дафн этилган жойидан қазиб олишдир. Эксгумация терговчи ёки суриштирувчининг қарори ва прокурорнинг санкцияси асосида ўтказилади. Қарорда эксгумациянинг сабаблари кўрсатилади. Суд мурдани эксгумация қилишни суриштирув органларига ёки терговчига топширади, бу ҳақда ажрим чиқаради. Юқоридаги илтимосномани айрим судланувчилар ва уларнинг адвокатлари қўллаб-қувватлади, баъзилари эса судга ҳавола этишди. Аммо жабрланувчиларнинг қонуний вакиллари бунга жиддий қаршилик қилди. Жабрланувчи А.Р.нинг отаси Р.К.нинг таъкидлашича, фарзанди грипп бўлганлиги сабабли шифокорга мурожаат этишган. Тумандаги шифокорлар тавсиясига кўра, “Dok-1 Makc” сиропини ичганидан кейин ўқчий бошлаган. Яъни қизчанинг аҳволи ўнгланиш ўрнига оғирлашган. Оқибатда бемор 2022 йил 16 декабрь куни Республика шошилинч тез тиббий ёрдам илмий марказига олиб келинган. Бироқ марказ шифокорларининг саъй-ҳаракатларига қарамай, у 2022 йил 23 декабрь куни вафот этган. Бинобарин, ўша сироп идиши шифокорларга тақдим этилган. Яна бир жабрланувчининг қонуний вакили – онаси М.Қ.нинг сўзларига кўра, тўрт ярим яшарли фарзанди 2022 йил октябрь ойида йўталган пайтда “Dok-1 Makc” сиропини ичирган ва бунинг самараси билинган. Шу боис она бўлмиш орадан 2 ой ўтгач, боласини йўтал тутган маҳали дорихонадан яна “Dok-1 Makc” олиб ичирган. Оқибатда бемор ўқчий-ўқчий комага тушиб қолган. Лекин 2022 йил 28 декабрь куни Республика шошилинч тез тиббий ёрдам илмий марказида ҳаётдан кўз юмган. Бу айрилиқни кўтаролмаган отаси 2023 йил апрель ойида вафот этган. Аёл гўдак фарзанди билан ёлғиз қолиб кетган. Хўжайинининг ўлимидан сўнг қайнона-қайнотаси уни уйдан ҳайдашган. Аёл болани даволатиш мобайнида эр-хотин катта миқдорда қарз бўлиб қолишганини билдириб, айни пайтда ҳақдорлар пулини сўраб келаётганини кўзида ёш билан маълум қилди. Шунга кўра, судланувчилардан моддий ва маънавий зарар ҳисобига 2 миллиард сўм ундириб беришни сўради. Бундан ташқари, Қумқўрғон туманида яшовчи Ҳ.С, Қўйи Чирчиқ туманида истиқомат қилувчи С.Ф.лар ҳам жабрланувчиларнинг қонуний вакили сифатида сўроқ қилинди. Жабрланувчиларнинг барчаси тиббиёт ходимларининг масъулиятсизлиги, совуққонлигидан ёзғириб, аниқ мисоллар келтирди. Суд 2023 йил 3 ноябрь куни ўз ишини давом эттиради. Хуршид СУЛТОНОВ, журналист