Кеча Тошкент шаҳар судида “Dok-1 Maks” иши бўйича навбатдаги суд мажлиси бўлиб ўтди. Суд жараёнига судья Мусо Юсупов раислик қилди. Бу галги суд мажлисида суд андижонлик жабрланувчи М.Н шахсий юмушлари юзасидан Тожикистон Республикасига кетганлиги сабабли судда видеоконференсалоқа орқали кўрсатма берди. У ҳеч қандай мутахассисликка эга бўлмаган бир танишининг тавсияси асосида 2020 йилда туғилган, “Грипп” касаллигига чалинган фарзандига “Dok-1 Maks” сиропини, сўнгра “Амбронол” дорисини ичирган. Оқибатда бола заҳарланиб вафот этган. Жабрланувчи судланувчиларга умрбод озодликдан маҳрум қилиш жазоси тайинлашни сўради. Наманганлик жабрланувчи Ҳ.Й. шамоллаган фарзандига “Амбронол” дори воситаси ва “Dok-1 Maks” сиропини ичирган. Оқибатда шу куни қизалоқда пешоб қилиш тўхтаган. Эртаси куни эса Республика шошилинч тез тиббий ёрдам илмий маркази Наманган филиали шифокорлари беморни Тошкентга жўнатишган. Аммо бемор қиз Республика шошилинч тез тиббий ёрдам илмий марказида 17 кун даволаниб, вафот этган. Жабрланувчи давлат айбловчисининг “Судланувчиларга қандай даъвойингиз?” деган саволига 1 миллиард сўм миқдорида товон пули талаб қилишини ва судланувчиларга энг оғир жазо берилишини билдирган. Жабрланувчи Г.Р. эса фарзанди дори воситаларидан заҳарланиб вафот этганидан буён ўтган 1 йил мобайнида кўз ёши тинмаётганини маълум қилди. Шунингдек, “Dok-1 Maks” сиропини мамлакатимизга олиб кирган шахсларга олий жазо тайинланишини сўраб, 10 миллиард сўм миқдорида моддий ва маънавий зарар ундириб берилишини талаб қилган. Суд 2023 йил 13 ноябрь куни ўз ишини давом эттиради. Хуршид СУЛТОНОВ, журналист