Франция Президенти Эммануэль Макрон Қозоғистонга ташрифидан сўнг 2 ноябрь куни Ўзбекистонга келади. Бу ҳақда AFP хабар берди. “Франция бу икки давлатни ислоҳот ва модернизация йўлида қўллаб-қувватлашга, халқаро муносабатларни диверсификация қилишга ҳисса қўшишга, уларнинг мустақиллиги ва суверенитетини қўллаб-қувватлашга, шунингдек, Европа билан муносабатларни мустаҳкамлаш ниятига тайёр”, — дейилади агентлик баёнотида. Қайд этилишича, Қозоғистон ва Ўзбекистонни Францияга яқинлаштиришдан мақсад “иқтисодий соҳада, хусусан, энергетика соҳасида, муҳим материаллар етказиб бериш, транспорт, соғлиқни сақлаш, қишлоқ хўжалиги ва мудофаа соҳаларида ҳамкорлик қилишдир”. Маълумотларга кўра, агар ташриф амалга ошса, Макрон Ўзбекистонга келган Франциянинг иккинчи Президенти бўлади. 1994 йилда Франциянинг 21-президенти Франсуа Миттеран Самарқандга келган.