Ички ишлар вазирлигининг Hudud24.uzга маълум қилишича, Қашқадарёда оғир оқибатли йўл транспорт ҳодисалари кўп содир бўлишига ҳайдовчилар белгиланган тезликка риоя қилмай, тезликни оширганликлари сабаб бўлмоқда. Масалан, 14-15 июнь кунлари Қашқадарё вилоятининг халқаро, давлат ва маҳаллий аҳамиятга эга автомобиль йўлларида 100 км/с белгиланган тезликка амал қилмай, ҳайдовчилар 164,144, 143, 140, 134, 124 км/сда машина бошқарганлиги ҳолати аниқланган. Эслатиб ўтамиз, Маъмурий жавобгарлик тўғрисидаги кодексга асосан Ўзбекистонда: Транспорт воситалари ҳайдовчиларининг белгиланган ҳаракат тезлигини соатига 40 километрдан ортиқ катталикда ошириб юбориши, — БҲМнинг 9 баравари (2.970.000) миқдорида жарима солишга сабаб бўлади. Транспорт воситалари ҳайдовчиларининг белгиланган ҳаракат тезлигини соатига 40 километрдан ортиқ катталикда худди шундай ҳуқуқбузарлик учун маъмурий жазо қўлланилганидан кейин 1 йил давомида такрор ошириб юбориши: транспорт воситасини бошқариш ҳуқуқидан 2 йил муддатга маҳрум қилиб, БҲМнинг 25 баравари миқдорида (8.250.000 сўм) жарима солишга сабаб бўлади. Ҳайдовчиларнинг транспорт воситаларини алкоголли ичимликдан, гиёванд модда таъсиридан ёки ўзгача тарзда маст ҳолда бошқариши: транспорт воситасини бошқариш ҳуқуқидан 1 йилу 6 ойдан 3 йилгача муддатга маҳрум қилиб, БҲМнинг 25 баравари миқдорида (8.250.000 сўм) жарима солишга сабаб бўлади. Ҳайдовчиларга ҳаракатланиш тезлиги билан боғлиқ қуйидаги ҳаракатлар тақиқланади: тезликни мазкур транспорт воситасининг техник тавсифномасида кўрсатилган энг юқори тезликдан ошириш; тезликни транспорт воситасига ўрнатилган “Тезлик чекланган” таниқлик белгисида кўрсатилганидан ошириш; зарурият бўлмаганда жуда паст тезликда ҳаракатланиб, бошқа транспорт воситаларига халақит бериш; йўл-транспорт ҳодисасининг олдини олиш зарурияти бўлмаганда кескин тормоз бериш.