Тошкент шаҳар, Чилонзор туманида яшовчи 21 ёшли О.В. Киберхавфсизлик марказига мурожаат қилиб, “номаълум шахс” Telegram орқали ўзини гўёки ижара учун эълон қилинган уй эгаси сифатида таништиргани ва О.В.нинг ишончига кириб, унинг банк картасидан 450 минг сўм миқдоридаги пулни алдов йўли билан олиб, суҳбат ёзишмаларини ўчириб юборганини маълум қилган. Тезкор-қидирув хизмати Киберхавфсизлик бўлинмалари томонидан ўтказилган тезкор-қидирув тадбирлари натижасида, ушбу жиноятни Қашқадарё вилояти, Қамаши туманида яшовчи 20 ёшли Ҳ.А. содир этганлиги аниқланган. Гумонланувчи сифатида тергов органларига жалб этилган Ҳ.А. интернет фойдаланувчиларига Telegram орқали ўзини “Уй эгаси” сифатида таништирган ҳолда, уларни қизиқтириб, банк карта маълумотларини фирибгарлик йўли билан қўлга киритиш орқали ундаги пулларни ўзлаштиргани аниқланган. Маълум қилинишича, мазкур ҳолат юзасидан Ҳ.А.га нисбатан Ўзбекистон Республикаси ЖКнинг 168-моддаси 1-қисми билан жиноят иши қўзғатилиб, тергов ҳаракатлари олиб борилмоқда. Қонунга мувофиқ, Ўзбекистон Республикаси Жиноят кодексининг 168-моддаси 1-қисмидаги жиноий хатти-ҳаракатлар учун базавий ҳисоблаш миқдорининг 50 бараваридан 100 бараваригача миқдорда жарима ёки 2 йилгача ахлоқ тузатиш ишлари ёки 1 йилдан 3 йилгача озодликни чеклаш ёхуд 3 йилгача озодликдан маҳрум қилиш жазоси назарда тутилган.