Яқинда ташкилотимизда бир ходимга II гуруҳ ногиронлиги белгиланди. Мен кадрлар бўлими ходими сифатида қандай ҳужжатларга ўзгартириш киритишим зарур?

Шуҳрат Муродов,

Фарғона вилояти 

– Меҳнат кодексининг 427-моддасига кўра, I ва II гуруҳ ногиронлиги бўлган ходимлар учун иш вақтининг давомийлиги ҳафтасига ўттиз олти соатдан ошмайдиган қилиб белгиланади.

I ва II гуруҳ ногиронлиги бўлган ходимлар учун кунлик ишнинг (сменанинг) давомийлиги тиббий-ижтимоий эксперт комиссиясининг тавсияларига мувофиқ белгиланади. Лекин олти кунлик иш ҳафтасида – олти соатдан, беш кунлик иш ҳафтасида – етти соату ўттиз дақиқадан ортиб кетмаслиги керак.

Бундан ташқари, Меҳнат кодексининг 427-моддасига асосан I ва II гуруҳ ногиронлиги бўлган ходимларга давомийлиги камида ўттиз календарь кундан иборат йиллик меҳнат таътили берилади. Улар бу таътилдан йилнинг ўзлари учун қулай бўлган вақтида фойдаланиши мумкин.

Агар йиллик меҳнат таътили берилаётган иш йили ходимга ногиронлик белгилангунига қадар ва белгиланганидан кейинги даврларни ёхуд мазкур ходимнинг ногиронлиги тиббий-ижтимоий эксперт комиссияси томонидан олиб ташлангунига қадар бўлган даврни ва олиб ташланганидан кейинги даврни қамраб олса, йиллик меҳнат таътилининг давомийлиги ногиронлик белгиланган даврдаги ва ногиронлик юзага келгунига қадар ёки ногиронлик олиб ташланганидан кейинги иш даврига мутаносиб равишда ҳисобланади.

I ва II гуруҳ ногиронлиги бўлган ходимни йиллик меҳнат таътилидан чақириб олишга йўл қўйилмайди.

Демак, юқоридагилардан келиб чиқиб айтганда, ходим билан тузилган меҳнат шартномасига қўшимча келишув тузиб, иш вақти ва меҳнат таътиллари қисмига ўзгартириш киритишингиз ҳамда буйруқ билан ўзгаришларни расмийлаштирингиз зарур. Шунингдек, уч иш куни ичида ходимни ушбу буйруқ билан таништиришингиз керак.

Саволга Фарғона шаҳар юридик хизмат кўрсатиш маркази

 бош юрисконсульти Забардаст Мирсолиев жавоб берди