Меҳнат шартномаси алоҳида асосларга кўра бекор қилинган айрим ходимларга муддатидан олдин ёшга доир пенсия тайинланиши мумкин. Бунинг учун белгиланган ёш ва меҳнат стажи талабларига жавоб бериш ҳамда уч ой давомида мақбул иш топилмаган бўлиши керак.

Вазирлар Маҳкамасининг 2026 йил 28 сентябрдаги 519-сон қарори билан тасдиқланган маъмурий регламентда тегишли тартиб белгиланган.

Унга кўра, меҳнат шартномаси алоҳида асосларга биноан бекор қилинган қуйидаги шахслар муддатидан олдин пенсия тайинлаш учун тақдимнома расмийлаштириш бўйича мурожаат қилиши мумкин:

умумий меҳнат стажи камида 25 йил бўлган 58 ёшдан 60 ёшгача эркаклар;

умумий меҳнат стажи камида 20 йил бўлган 53 ёшдан 55 ёшгача аёллар.

Сўровнома Ягона интерактив давлат хизматлари портали — ЯИДХП орқали юборилади. Унга меҳнат шартномаси бекор қилингани ҳақидаги буйруқ нусхаси илова қилиниши керак. Агар меҳнат стажи тўлиқ рақамлаштирилмаган бўлса, меҳнат дафтарчаси нусхаси ҳам тақдим этилади.

Маҳаллий меҳнат органи ҳужжатларни икки иш куни ичида текширади. Шундан сўнг мурожаат қилган фуқаро иш қидираётган шахс сифатида рўйхатга олинади ва унга уч ой давомида мақбул иш топиш чоралари кўрилади.

Агар шу муддат ичида мақбул иш топилмаса, фуқаро ишсиз деб эътироф этилади. Муддатидан олдин ёшга доир пенсия тайинлаш учун тақдимнома эса Пенсия жамғармасига юборилади.

Пенсия тайинланганидан кейин ишсизлик нафақасини тўлаш кейинги ойдан бошлаб тўхтатилади.

Мазкур давлат хизмати бепул кўрсатилади.