Ўзбекистон Республикаси Нотариал палатаси халқаро нотариат майдонига шиддат билан кириб бормоқда. Шу кунгача Нотариал палата Украина, Литва, Беларусь Республикалари Нотариал палаталари билан ҳамкорлик тўғрисида меморандум имзолади. Хорижда ишлаётган ва яшаётган ҳамюртларимизга кўрсатилаётган нотариал ҳаракатлар сифатини яхшилаш борасида Ўзбекистон Ташқи ишлар вазирлиги билан ҳам ўзаро келишув шартномаси имзоланди. Февраль-март ойларида Нотариал палата раисининг нотариат соҳасидаги ислоҳотлар тўғрисидаги мақоласи Саудия Арабистони, Уммон қироллиги, Россия Федерацияси, Қозоғистон ва Украина давлатлари ОАВ ларида эълон қилинган эди. Май ойининг дастлабки ҳафтасида Дилшод Ашуровнинг мақолалари Италиянинг «Газета ди Салерно», «Газета ди Наполи», «Газета ди Авиллино», «Газета ди Милано» газеталарида эълон қилинганлиги қувонарли ҳолдир. Нотариал палата шу йил охирига қадар Халқаро нотариуслар иттифоқига аъзо бўлишга тадорик кўрмоқда. Буларнинг барчасидан мақсад — халқаро майдонда янги Ўзбекистон имижи яхшиланишига ҳисса қўшиш билан бирга нотариат соҳасини чет эл тажрибасига асосланган ҳолда такомиллаштириб бориш, Ўзбекистон тажрибасини тарғиб қилишдан иборатдир. Бугун Қозоғистон Республикаси Нотариал палатаси раиси Асель Жанабилова билан Ўзбекистон Республикаси Нотариал палатаси раиси Дилшод Ашуров меморандум имзолади. Меморандум имзолаш жараёнида Асель Жанабилова Ўзбекистонда сўнгги бир йил ичида нотариат соҳасида рўй берган янгиликларни кузатиб бораётгани, аҳолига катта қулайликлар яратиш мақсадида электрон тизимга ўтилганлигини эътироф этди. Халқаро нотариуслар иттифоқига аъзо бўлиш борасида олиб борилаётган саъй-ҳаракатларни маъқуллади. Сўнгра меморандум имзолаш жараёни ўтказилди. Меморандум доирасида ҳар иккала давлат нотариал палаталарининг ўзаро тажриба алмашиш, илғор тажрибаларни ўрганиш, халқаро конференциялар ўтказиш ҳамда нотариал ҳаракатлар юзасидан мурожаатларни биргаликда кўриб чиқиш борасида келишиб олинди.