“Истеъмолчиларнинг ҳуқуқларини ҳимоя қилиш тўғрисида”ги Қонуннинг 1-моддасида товарнинг яроқлилик муддати тушунчасига шундай таъриф берилган: яъни, “яроқлилик (сақлаш) муддати – муайян давр бўлиб, бу даврда товар фойдаланишга яроқли бўлади ва у тамом бўлгач, товар одамлар ҳаёти ҳамда соғлиғи учун хавф туғдириши мумкин”.

Товар ўз вазифаси бўйича фойдаланиш учун яроқсиз ҳолга келиб қолади, деб ҳисобланадиган вақт яроқлилик муддати даври ҳисобланади. Фуқаролик кодексининг 405-моддаси 2-қисмига кўра, сотувчи яроқлилик муддати белгиланган товарни сотиб олувчига шундай мўлжал билан топшириши керакки, токи ундан яроқлилик муддати тугагунга қадар ўз вазифаси бўйича фойдаланиш  мумкин бўлиши керак. Товарнинг яроқлилик муддати товар тайёрланган кундан бошлаб фойдаланиш учун яроқли бўлган давр билан ёки товар фойдаланиш учун яроқли бўлиб турадиган сана билан белгиланади.

Яроқлилик муддати ўтган маҳсулот бевосита (ёки функционал) мақсадда фойдаланиш учун яроқсиз ҳисобланади.

Яроқлилик муддати узайтирилиши мумкин эмас.