Ўзбекистон Адлия вазирлиги томонидан муаллифлик ҳуқуқига нисбатан ҳурмат ҳиссини юксалтириш, ижод аҳли фаолиятини ҳар томонлама қўллаб-қувватлаш, шунингдек, соҳага оид ҳуқуқий маданиятни кенг жамоатчилик орасида тарғиб қилиш мақсадида ҳуқуқий акция ўтказиш белгиланган. Шу мақсадда октябрь ойи “Санъат ва ижод ҳимояси ойлиги” деб эълон қилиниб, ўқувчиларни муаллифлик ҳуқуқи билан боғлиқ маълумотлар билан таништириб боришни кўзладик.

Ўзбекистон Республикаси Маъмурий жавобгарлик тўғрисидаги кодекс 177-1-моддасида муаллифлик ҳуқуқини бузганлик учун жавобгарлик белгиланган. Асарлардан ёки турдош ҳуқуқлар объектларидан қонунга хилоф равишда фойдаланиш, худди шунингдек асарларнинг ёки турдош ҳуқуқлар объектларининг контрафакт нусхаларини такрорлаш, тарқатиш, барчанинг эътиборига етказиш ёхуд асарларнинг ёки турдош ҳуқуқлар объектларининг нусхаларида уларнинг тайёрловчилари ҳақида, уларни ишлаб чиқариш жойлари тўғрисида, шунингдек муаллифлик ҳуқуқининг ва турдош ҳуқуқларнинг эгалари ҳақида ёлғон ахборотни кўрсатиш:

— асарларнинг ва турдош ҳуқуқлар объектларининг контрафакт нусхаларини, шунингдек уларни такрорлаш ҳамда тарқатиш учун фойдаланиладиган материаллар ва ускуналарни ҳамда бошқа ҳуқуқбузарлик содир этиш қуролларини мусодара қилиб, фуқароларга БҲМнинг 5 бараваридан 15 бараваригача, мансабдор шахсларга эса — 15 бараваридан 30 бараваригача миқдорда жарима солишга сабаб бўлади.

Худди шундай ҳуқуқбузарликлар маъмурий жазо чораси қўлланилганидан кейин 1 йил давомида такрор содир этилган бўлса, —

асарларнинг ва турдош ҳуқуқлар объектларининг контрафакт нусхаларини, шунингдек уларни такрорлаш ҳамда тарқатиш учун фойдаланиладиган материаллар ва ускуналарни ҳамда бошқа ҳуқуқбузарлик содир этиш қуролларини мусодара қилиб, фуқароларга БҲМнинг 15 бараваридан 30 бараваригача, мансабдор шахсларга эса — 30 бараваридан 50 бараваригача миқдорда жарима солишга сабаб бўлади.