Инсон умри йўлга ўхшайди. Бир манзилдан чиқиб, яна бир манзилга интилар экан, ҳар бир сафар унинг қалбида янги из қолдиради. Айниқса, самодаги сафар – бу оддий ҳаракат эмас, балки Ер билан осмон орасидаги сукутли мулоқотдир. Аммо баъзан шундай муаммоларга дуч келамизки, сафар таассуротлари ижобийликдан салбийликка, аъло кайфият эса тушкунликка уйғунлашиб кетиши мумкин. Боиси, турли кичик муаммолар ҳам инсоннинг табини хира қилиши ҳеч гап эмас. Шу мақсадда қуйидаги маълумотларни беришга қарор қилдик.

Тасаввур қиламиз, чиптанинг эгаси сафар кунигача вафот этди. Энди чиптанинг тақдири қандай бўлади? Вафот этган ёки соғлиғи оғирлашган ҳолатларда йўловчи ёки унинг вакили ё тегишли ҳуқуққа эга бўлган шахслар чиптанинг пулини қайтариб олиш ҳуқуқига эгадирлар.

Ташувчи чипта учун амалга оширилган тўловни қайтаришда, ушбу чипта сотиб олишда қўлланилган тўлаш усули ва пул бирлиги бўйича қайтариш ҳуқуқини ўзида қолдиради.

Шунингдек, йўловчи чиптани расмийлаштираётганда, қайси бир йўналиш манзилида тўхташи ҳақида ташувчини олдиндан хабардор қилмаган бўлса, бу тўғрисида транзит аэропортида ёки ташиш йўналиши трансферида хабардор қилган бўлса ва ушбу ҳолат парвознинг кечикишига сабаб бўлса, йўловчи парвознинг кечиккани учун ташувчининг қоидаларида назарда тутилган йиғимларни тўлаганидан сўнг, парвозни давом эттириши мумкин.

 Агар парвознинг кечикишига йўловчи ёки у билан бирга ҳаво кемасида учаётган оила аъзоларидан бирининг соғлиғининг ёмонлашиши ёки тўхташ манзилидаги форс-мажор ҳолатлари сабаб бўлса, бундай ҳолатда йўловчидан йиғим ундирилмайди, бунда соғлиқни ёмонлашганлик ҳолати тиббий хулоса билан тасдиқланиши керак.

Ташувчи ўзи билан боғлиқ бўлган сабабларга кўра, оралиқ аэропортда ташишни давом эттира олмаган тақдирда, йўловчиларни уларга қулай бўлган муддатларда ва шартларда ўзининг навбатдаги қатнови билан ҳаракатланаётган ҳаво кемасида ёки бошқа ташувчининг ҳаво кемасида, қўшимча тўловларсиз жўнатиши лозим.

Ҳуқуқингизни билинг ва талаб қилинг.