Қонунчиликда ногиронлиги бўлган шахслар ва уларга ғамхўрлик қилувчи фуқаролар учун 80 дан ортиқ имтиёзлар берилган. Hudud24.uz қуйида шуларнинг айримлари ҳақида тўхталиб ўтади.

1. Солиқ тўлови бўйича имтиёз.  I ёки II гуруҳ ногиронлиги бўлган шахс фаолият туридан ва уни амалга ошириш жойидан қатъи назар, ойига қатъий белгиланган миқдордаги солиқнинг 50 фоизини, бироқ БҲМнинг 50 фоизидан кўп бўлмаган миқдорда тўлайди.
2. Болаликдан ногиронлиги бўлган шахслар ҳамда I ва II гуруҳ ногиронлиги бўлган шахслар учун даромад солиғи бўйича имтиёз. Болаликдан ногиронлиги бўлган шахслар ҳамда I ва II гуруҳ ногиронлиги бўлган шахслар учун даромад солиғи бўйича белгиланган имтиёз меҳнатга ҳақ тўлашнинг энг кам миқдорининг 1,41 бараваридан 3 бараваригача оширилди.
3. Ногиронлиги бўлган шахсларга нафақалар ва парвариш нафақаларни тайинлаш. Ногиронлиги бўлган 18 ёшгача болалар ва одамнинг иммунитет танқислиги вируси келтириб чиқарадиган касалликка чалинган 18 ёшгача болаларга тўланадиган нафақалар ҳамда парваришлаш нафақаси фуқаролардан қўшимча ҳужжатларни талаб этмаган ҳолда “проактив шакл”да тайинланади.
4. Ногиронлик ва боқувчисини йўқотганлик пенсиялар тўлови. Ногиронлиги бўлган шахсларга ва вафот этган ногиронлиги бўлган шахснинг қарамоғидаги меҳнатга лаёқатсиз оила аъзоларига ҳар ойда пенсия тўланади.
5. Ногиронлиги бўлган шахсларнинг пенсиясига устамалар бериш. Пенсияга устама ҳақлар қуйидаги миқдорларда белгиланади:

• а) I гуруҳ уруш оқибатида ногиронлиги бўлган шахсларга - пенсияни ҳисоблашнинг базавий миқдорининг 150 фоизи;
• б) II гуруҳ уруш оқибатида ногиронлиги бўлган шахсларига - пенсияни ҳисоблашнинг базавий миқдорининг 125 фоизи;
• в) кўриш бўйича I гуруҳ ногиронлиги бўлган шахсларига - пенсияни ҳисоблашнинг базавий миқдорининг 100 фоизи;
• г) I гуруҳ ногиронлиги бўлган шахсларига — пенсияни ҳисоблашнинг базавий миқдорининг 75 фоизи;
• д) II гуруҳ ёлғиз ногиронлиги бўлган шахсларига - пенсияни ҳисоблашнинг базавий миқдорининг 75 фоизи.

6. Ногиронлиги бўлган шахслар меҳнатидан уларга соғлиғининг ҳолатига кўра қарши кўрсатма бўлган ишларда фойдаланишни тақиқлаш. Ногиронлиги бўлган шахслар меҳнатидан уларга соғлиғининг ҳолатига кўра қарши кўрсатма бўлган ишларда фойдаланиш тақиқланади. Тиббий-ижтимоий эксперт комиссиясининг ногиронлиги бўлган шахсларнинг тўлиқсиз иш вақти режими тўғрисидаги, юкламани камайтириш ҳақидаги ва меҳнатнинг бошқа шарт-шароитлари тўғрисидаги тавсиялари иш берувчи томонидан бажарилиши мажбурийдир.
7. Ногиронлиги бўлган шахслар ўз танловига кўра сертификат бериш тизими орқали исталган ишлаб чиқарувчидан протез-ортопедия буюмлари ва реабилитация қилишнинг техник воситаларини бепул олади ва фойдаланади. Фойдаланиш муддати:

• Қўл протезлари: елка протези, елкадан олиб ташлангандан кейинги қўл протези, билак протези, кафт протези-24 ой
• Оёқ протезлари: сон протези, сон олиб ташлангандан кейинги оёқ протези, болдир протез - 24 ой
• Қўл ва оёқ камари ортопед аппаратлари, пластик корсетлар - 24 ой
• Корсет - 24 ой,
• Кўкрак бези экзопротези - 12 ой
• Қўл ва оёқ камари тутори-12 ой
• Бандаж-12 ой
• Мураккаб ортопед пойабзал ва протезга пойабзал -12 ой
• Эшитиш мосламаси- 48 ой
• Қўлтиқ таёқ- 24 ой,
• Ҳасса-24 ой
• Тирсакли қўлтиқ таёқ - 24 ой
• Кўзи ожизлар учун ҳасса - 24 ой
• Юриш мосламаси (ходунок) - 24 ой
• Пешоб қабул қилгич - 1 ой
• Нажас қабул қилгич - 1 ой
• Хона ўриндиқли аравача - 60 ой
• Сайр ўриндиқли аравача - 60 ой