Ўзбекистон Республикасининг 22.12.2010 йилдаги ЎРҚ-269-сон қонунига кўра, риэлторлик фаолияти юридик ва жисмоний шахсларнинг кўчмас мулк объектларига ва уларга бўлган ҳуқуқларга доир битимлар тузиш билан боғлиқ хизматларни шартнома асосида кўрсатиш бўйича тадбиркорлик фаолиятидир. Шунга кўра, риэлторлик фаолиятини амалга оширишнинг муҳим талаблари риэлтор якка тартибдаги тадбиркор мақомига, малака сертификатига ва ўз фуқаролик жавобгарлигини суғурта қилиш полисига эга бўлгандагина ушбу Қонунда белгиланган тартибда амалга оширади.

Риэлтор кўчмас мулк объектларига ва уларга бўлган ҳуқуқларга доир битимларни тузиш чоғида воситачилик хизматлари кўрсатиши мумкин.

Риэлторлик фаолияти қуйидаги турлардаги риэлторлик хизматларини кўрсатиш орқали амалга оширилади:

— кўчмас мулк объектларига ва уларга бўлган ҳуқуқларга доир битимларни тузиш чоғидаги воситачилик;

— кўчмас мулк объектларининг ва уларга бўлган ҳуқуқларнинг савдосини ташкил этиш;

— кўчмас мулк объектларини ишончли бошқариш;

— кўчмас мулк бозорида ахборот ва маслаҳат хизматлари.

Малака сертификати риэлторлик ташкилот сифатида хизмат кўрсатаётганда штатида риэлторнинг малака сертификатига эга бўлган камида икки нафар ходим, шу жумладан риэлторлик ташкилотининг раҳбари бўлиши керак. Риэлторлик ташкилоти давлат ҳокимияти ва бошқаруви органлари томонидан ташкил этилиши мумкин эмас.

Кўчмас мулк объектларига ва уларга бўлган ҳуқуқларга доир битимларни тузиш чоғидаги воситачилик  хизматлари кўрсатишда кўчмас мулк объектларига ва уларга бўлган ҳуқуқларга доир битимларни тузиш чоғидаги воситачилик (кўчмас мулкнинг олди-сотдиси, ижараси, гарови, айирбошланиши, ҳадя этилиши, рентаси, кўчмас мулкдан текин фойдаланилиши ва умрбод таъминлаш шарти билан уй-жойни (квартирани) бошқа шахсга бериш билан боғлиқ ҳаракатлар) қонунчиликда белгиланган тартибда буюртмачи билан тузилган риэлторлик хизматлари кўрсатиш шартномаси асосида риэлторлик ташкилоти томонидан амалга оширилади. Бунда риэлторлик ташкилоти мазкур битимларнинг бевосита тарафи бўлиши мумкин эмас.

Бехрўз Жўраев,
“Адолат” миллий ҳуқуқий ахборот маркази
масъул ходими