Жорий йилнинг 7-8 сентябрь кунлари Самарқанд Озиқ-овқат хавфсизлигига бағишланган халқаро конференцияга мезбонлик қилади. Халқаро конференцияда иштирок этиш учун дунёнинг 32 та мамлакатидан ташриф буюрадиган 2330 нафар хорижий эксперт анжуман доирасида дунёдаги глобал ўзгаришлар борасидаги ўз фикр-мулоҳазалари билан ўртоқлашадилар. Шунингдек, қишлоқ хўжалиги экинларини етиштириш ва қайта ишлаш дастурларини ишлаб чиқиш, тўғридан-тўғри ўзаро етказиб беришнинг келишилган схемаларини шакллантириш, озиқ-овқат хавфсизлигини таъминлаш масаласининг барча соҳаларида, шу жумладан сув ва ер ресурслари, рақамлаштириш ва инновациялар, денгизга чиқа олмайдиган мамлакатларга сифатли ва арзон озиқ-овқат маҳсулотларини етказиб бериш учун самарали логистика, “Яшил” ва экспресс йўлакларни ташкил этиш масалалари, қишлоқ хўжалик маҳсулотларини етиштиришдаги инновацион ва яхши натижа берган лойиҳаларга кенг ўрин ажратилади. Конференция доирасида миллий, минтақавий ва глобал миқёсда озиқ-овқат хавфсизлигини таъминлашнинг ҳозирги ҳолати тўғрисида кенг фикр алмашилади. 2030 йилгача очликни йўқ қилиш, барқарор қишлоқ хўжалигини ривожлантиришда аниқ вазифаларни ўз ичига олган “Ноль очлик”ка эришиш бўйича чора-тадбирларни амалга ошириш ҳолати чуқур таҳлил қилинади. Қолаверса, анжуман якунида Ўзбекистон истиқболига қаратилган лойиҳалар тақдимоти ўрин олган инвестицион форум ўтказилиши ҳам режалаштирилган. Айни дамда, конференция доирасидаги тадбирлар ташкил этиладиган локацияларда сўнгги тайёргарлик ишлари олиб борилмоқда. Техник сессиялар, инвестицион форум, кўргазма намойиши, Ўзбекистон қишлоқ хўжалиги имкониятлари билан танишув объектларида барча ишлар режадагидек амалга ошириляпти. Тадбир ўтказилиши режалаштирилган Kongress hallда халқаро конференцияга тайёргарлик кўриш ва уни ўтказиш бўйича штаб 15 августдан бошлаб фаолият юритмоқда. Қишлоқ хўжалиги вазирлиги мутасаддилари бошчилигида барча вазирлик, идора ва ташкилот масъуллари ўз йўналишлари бўйича ташкилий масалаларни ҳал қилишмоқда.