Мажбуриятлар бажарилган, далолатнома имзоланган, лекин контрагент тўловни кечиктираётган бўлса, у ҳолда нима қилиш лозим? Қатъий тартиб бўйича ҳаракат қилиш мақсадга мувофиқ ҳисобланади.

Бунда аввало, шартнома шартларини синчиклаб кўриб чиқиш керак. Белгиланган муддат етиб келганми, шартнома шартларида «келишувга кўра» ёки «имкон борича» каби ноаниқ иборалар мавжуд эмасми.

Шартнома шартлари кўриб чиқилгандан сўнг, қарзни белгиланган муддатда тўлаш талабини ўз ичига олган ёзма талабнома юбориш мақсадга мувофиқ ҳисобланади. Бу шунчаки расмиятчилик эмас балки қонунчиликда белгиланган талаб ҳисобланади. Кўп ҳолларда бундай талабномасиз суд даъвони қайтариб юбориши мумкин.

Тўлов амалга ошмаган тақдирда, шартнома шартларига кўра неустойка ёки бошқа шахсларнинг пул маблағларидан фойдаланганлик учун фоизлар ҳисобланади. (ФК 327-м.).

Жавоб бўлмаган тақдирда, қарз, неустойка ва харажатларни ундириш тўғрисида даъво аризаси билан судга мурожаат қилиш жоиз ҳисобланади. Суд қарори кучга киргандан сўнг эса ижро варақасини олиб, уни жавобгар яшаш (жойлашган) жойи бўйича МИБга тақдим этиш лозим.

Агарда бундай вазиятларга тушишни ҳоҳламаган шахс аввало шартномада аниқ тўлов муддатларни, кечиктирилган тўлов учун неустойка миқдорини ва мажбуриятлар бажарилмаганда шартномани бекор қилиш ҳуқуқини олдиндан белгилаб қўйиш лозим.