“Истеъмолчилар ҳуқуқларини ҳимоя қилиш тўғрисида”ги қонуннинг 16-моддасига кўра, агар сотувчи (ишлаб чиқарувчи) истеъмолчининг товарни алмаштириб бериш ёки ундаги нуқсонларни бартараф этиш ҳақидаги талабларини бажармаган бўлса, истеъмолчи товарнинг харид нархини нуқсонга мутаносиб равишда камайтиришни ёки шартномани бекор қилиб, етказилган зиён ва маънавий зарарни ушбу Қонуннинг 20 ва 22-моддаларига мувофиқ қоплашни талаб қилишга ҳақли.

“Чакана савдо қоидалари”нинг 189-бандига асосан эса, харидорга узоқ муддат фойдаланиладиган сифати ёмон товарни таъмирлаш ёки алмаштириш даврида яхши сифатли ана шундай товарни беришдан бош тортиш савдо қоидалари бузилишининг бир тури ҳисобланиб, ҳуқуқбузарлик даражасига қараб Маъмурий жавобгарлик тўғрисидаги кодексларига мувофиқ жавобгарликка сабаб бўлиши белгилаб қўйилган.

Маъмурий жавобгарлик тўғрисидаги кодекснинг 164-моддасига мувофиқ, савдо ёки хизмат кўрсатиш қоидаларини бузиш фуқароларга энг кам иш ҳақининг бир бараваридан беш бараваригача, мансабдор шахсларга эса — беш бараваридан етти бараваригача миқдорда жарима солишга сабаб бўлади.