Рўйхатдан ўтказиш тартиби қандай амалга оширилади?

Давлат рўйхатидан ўтказиш учун ариза берувчи «бизнесни рўйхатдан ўтказиш» — давлат хизматини танлайди ва давлат рўйхатидан ўтказиш учун қуйидаги белгиланган ариза шакллари бўйича:

юридик шахс ташкил этмаган тадбиркорлик субъектини (якка тартибдаги тадбиркорни) давлат рўйхатидан ўтказиш аризасига мувофиқ юридик шахс ташкил этмаган тадбиркорлик субъектларининг;

тадбиркорлик субъектини — юридик шахсни давлат рўйхатидан ўтказишга мувофиқ тадбиркорлик субъектлари — юридик шахсларнинг уни кўрсатишга сўровномани шакллантиради.

Электрон онлайн-аукцион савдода ғолиб бўлган шахснинг юридик шахс ташкил этмаган ҳолда (якка тартибдаги тадбиркор) деҳқон хўжалигини ташкил этишга доир маълумотлари реал вақт режимида «E-auksion» электрон савдо платформаси орқали Тизимга келиб тушади.

Ариза берувчи томонидан сўровнома шакллантирилиши босқичма-босқич амалга оширилади. Ариза берувчи сўровномани сўралаётган маълумотларни киритиш ва Тизим томонидан умумий маълумотномадан таклиф этилаётган маълумотларни танлаш йўли билан шакллантиради. Ариза берувчи сўровномани шакллантиришни исталган босқичда тўхтатиш ёки давом эттириш ҳуқуқига эга.

Тизим воситасида давлат рўйхатидан ўтказиш учун тегишлича сўровномага қандай ҳужжатлар илова қилинади?

Тизим воситасида давлат рўйхатидан ўтказиш учун тегишлича сўровномага қуйидагилар илова қилинади:

давлат тилидаги таъсис ҳужжатлари;

монополияга қарши органнинг дастлабки розилик берилганлиги тўғрисидаги қарори — давлат иштирокидаги хўжалик юритувчи субъектлар, шунингдек уларнинг аффилланган шахслари учун;

Давлат активларини бошқариш агентлигининг ёки унинг ҳудудий бошқармаларининг давлат муассасалари ва давлат иштирокидаги корхоналарни ташкил этиш, шунингдек, давлат улушининг вужудга келиши ва давлат улуши миқдорининг ўзгариши билан боғлиқ таъсис ҳужжатларига ўзгартиришларга оид буйруғи — давлат муассасалари, шунингдек, хўжалик жамиятлари учун (акциядорлик жамиятлари бундан мустасно);

топшириш далолатномаси — қўшиб юборилганда;

тақсимлаш баланси — бўлишда ва ажратиб чиқаришда.

Қайта рўйхатдан ўтказишда нималарга эътибор қилиш лозим?

Рўйхатдан ўтказиш маълумотларининг давлат рўйхатидан ўтказиш (қайта рўйхатдан ўтказиш) шарт бўлган ўзгартиришлари ва қўшимчаларининг рўйхатига кўра, рўйхат бўйича рўйхатдан ўтказиш маълумотларига киритилган ўзгартириш ва қўшимчалар мажбурий қайта рўйхатдан ўтказилади.

Бунда жойлашган жойи (почта манзили) ўзгарганда юридик шахслар — тадбиркорлик субъектларининг рўйхатдан ўтказиш маълумотларига киритилган ўзгартириш ва қўшимчалар, базавий ҳисоблаш миқдорининг уч юз бараваридан ортиқ солиқ қарзи мавжуд бўлмаган тақдирда, рўйхатдан ўтказувчи органни хабардор қилиш тартибида амалга оширилади.

Қайта ташкил этилаётган тадбиркорлик субъектини — юридик шахсни давлат рўйхатидан ўтказиш тартиби

Қайта ташкил этиш йўли билан тузилаётган тадбиркорлик субъектларини — юридик шахсларни давлат рўйхатидан ўтказиш, қайта рўйхатдан ўтказиш Тизим воситасида амалга оширилади.

Тадбиркорлик субъекти — юридик шахс:

ажратиб чиқариш йўли билан қайта ташкил этилганда — қайта ташкил этилаётган тадбиркорлик субъекти — юридик шахсга нисбатан унинг таъсис ҳужжатлари билан боғлиқ бўлган қайта рўйхатдан ўтказиш, ажратиб чиқарилаётган тадбиркорлик субъекти — юридик шахсга нисбатан эса — янгидан тузилган тадбиркорлик субъектини — юридик шахсни давлат рўйхатидан ўтказиш амалга оширилади;

қўшиб олиш йўли билан қайта ташкил этилганда — қўшиб олиш амалга оширилаётган тадбиркорлик субъектининг — юридик шахснинг таъсис ҳужжатлари билан боғлиқ бўлган қайта рўйхатдан ўтказиш Реестрга қўшиб олинган юридик шахс фаолиятини тугатиш тўғрисида ёзув киритиш билан амалга оширилади;

қўшиб юбориш, бўлиш ва ўзгартириш йўли билан қайта ташкил этилганда — янгидан тузилган тадбиркорлик субъектини — юридик шахсни давлат рўйхатидан ўтказиш амалга оширилади.

Ўзи келган ҳолда давлат рўйхатидан ўтказиш амалиёти мавжудми?

Ариза берувчилар давлат рўйхатидан ўтказиш, қайта рўйхатдан ўтказиш учун тегишли рўйхатдан ўтказувчи органга ўзлари келиб мурожаат қилиш ҳуқуқига эга.

Рўйхатдан ўтказувчи органга ўзи келиб мурожаат қилинганида қоғоз ҳужжатларнинг асл нусхалари бир нусхада тақдим этилади.

Агар Тизим фойдаланувчисига — рўйхатдан ўтказувчи орган масъул ходимига ҳужжатлар ўзи келиб ариза берувчининг вакили томонидан тақдим этилса, шунингдек унинг шахсини тасдиқловчи ҳужжат (паспорт, ҳарбий билет, ҳайдовчилик гувоҳномаси, шахсини ва Ўзбекистон Республикасидаги яшаш жойини тасдиқловчи бошқа ҳужжат) ва ариза берувчи вакилининг ваколатларини тасдиқловчи ҳужжат (ишончнома, шартнома, тадбиркорлик субъекти — юридик шахс муассисларининг қонун ҳужжатларида белгиланган тартибда расмийлаштирилган қарори, қонун ҳужжатларига мувофиқ бошқа ҳужжатлар) тақдим этилади.