Тошкент халқаро аэропортида 8,5 тонна гиёҳвандлик моддаси қўлга олинди. Пишириқлар устига сепиладиган қандолат кўкнориси сифатида божхона постидан ўтказилаётган 1000 та қоп ичидаги уруғлар ҳақиқий гиёҳвандлик моддаси бўлиб чиқди ва бу 30 йил ичида қўлга тушган энг йирик миқдор эканлиги айтилмоқда. Хабар берилишича, Божхона қўмитаси ва Давлат хавфсизлик хизмати томонидан “Тошкент-Аэро” ихтисослаштирилган божхона комлексининг “Авиаюклар” ташқи иқтисодий фаолият божхона постида ҳаво йўллари орқали республикага хориждан олиб келиниб, сўнгра юк автотранспорт воситаси орқали транзит тарзида олиб ўтилиши режалаштирилган 25 тонна оғирликдаги 1000 қоп қандолат кўкнориси уруғлари божхона кўригидан ўтказилган. Маълум қилинишича, одатда турли пишириқларга қўшиладиган ёки юзасига сепиладиган қандолат кўкнориси гарчи ўхшаш бўлса-да, анъанавий кўкнори гиёҳвандлик воситасидан тубдан фарқ қилади. Яъни, ушбу маҳсулот кўкнори оиласига мансуб ўт ўсимликларнинг махсус тайёрланган ва қайта ишланган уруғлари ҳисобланади. Қайд этилишича, божхона кўриги давомида ҳужжатларда қандолат кўкнориси деб кўрсатилган 25 тонна уруғ ва сомонлар таркибида ҳақиқий гиёҳвандлик воситаси ҳисобланган 8,5 тонна кўкнори сомони борлиги аниқланган. Ушбу ҳолат юзасидан божхона органлари томонидан жиноят иши қўзғатилди.