Транспорт воситасини бошқариш ҳуқуқидан маҳрум этилган ҳайдовчи муддатидан олдин бошқариш ҳуқуқини тиклаши мумкинми?

Фуқаролар транспорт воситаси орқали ҳуқуқбузарликлар содир этган тақдирда суд томонидан транспорт воситасини бошқариш ҳуқуқидан турли муддатларга маҳрум этилиши мумкин. Суд томонидан белгиланган вақтни муддатидан олдин бекор қилиши мумкинми?

Ўзбекистон Республикаси Маъмурий жавобгарлик тўғрисидаги кодексининг 343-моддасига кўра, муайян муддатга транспорт воситасини бошқариш ҳуқуқидан ёки ов қилиш ҳуқуқидан маҳрум этилган шахс меҳнатга ҳалол муносабатда бўлиши ва намунали хулқ-атвори билан ўзини кўрсатган тақдирда, унга нисбатан жазо қўллаган жиноят ишлари бўйича суд бундай ҳуқуқдан маҳрум қилиш муддатини белгиланган муддатнинг камида ярми ўтгач ва суд томонидан тайинланган жарима тўлангач, корхона, муассаса, ташкилот маъмуриятининг илтимоси билан қисқартириши мумкин.

Дейлик, ҳайдовчилик гувоҳномасидан бир йилга маҳрум этилган ҳайдовчи муддатнинг ярми ўтган бўлса ҳайдовчи ишлаётган ташкилот маъмурияти ушбу фуқарони транспорт воситасини бошқариш ҳуқуқидан маҳрум этилган муддатини қисқартиришингизни сўраймиз деган мазмундаги илтимоснома билан судга мурожаат қилса суд томонидан белгиланган муддат тўлиқ тугамасидан ҳайдовчининг  автомашина бошқариш ҳуқуқи қайта тикланиши мумкин.