2025 йил 17 ноябрда Тошкент шаҳрида Ўзбекистон Республикаси Сув хўжалиги вазирлиги томонидан Осиё тараққиёт банки, Жаҳон банки, Швейцария тараққиёт ва ҳамкорлик агентлиги (SDC) ва бошқа донорлар биргаликда ташкил этилган Ҳалқаро сув ҳамкорлиги ва Ўзбекистон Республикасининг сув қонунчилигини такомиллаштиришга бағишланган конференцияси бўлиб ўтди.

Конференциянинг асосий мақсадлари – халқаро ҳамкорликни мустаҳкамлаш, тажриба алмашиш ва сув қонунчилигини такомиллаштириш, шунингдек сув соҳасида замонавий бошқарув, рақамли ва иқтисодий инструментларни жорий қилиш бўйича мулоқотни ривожлантиришдан иборат.

Халқаро сув ҳамкорлиги мамлакатларнинг умумий сув ресурслари масалаларида, айниқса, трансчегаравий сув объектларида қўшма саъй-ҳаракатларни уйғунлаштириш, сув ресурсларини тежаш ва атроф-муҳитни муҳофаза қилишда муҳим омил ҳисобланади.

Конференциянинг марказий мавзуларидан бири – Ўзбекистон Республикасининг янги Сув кодексини тақдим этиш бўлди. Кодекс барқарор сувдан фойдаланиш, соҳани шаффоф тартибда тартибга солиш ва сув экотизимларини ҳимоя қилиш бўйича ҳуқуқий асосларни белгилайди.

Конференция ишида "Адолат" миллий ҳуқуқий ахборот маркази мутахассислари ҳам қатнашишди.

Кодекс замонавий халқаро стандартлар ва Марказий Осиёнинг энг яхши амалиётларига мувофиқ, кўпроқ мослашувчан, интеграцияланган ва илмий асосланган сув бошқаруви моделини жорий этиш имкониятларини яратади.

Таъкидланганидек, Марказий Осиё давлатлари сув хўжалиги вазирлари ва халқаро ташкилотлар вакилларининг иштирок этиши минтақавий ҳамкорликнинг умумий сув муаммоларини ҳал қилишда аҳамиятининг ортиб бораётганини кўрсатади.

Конференцияда сув таъминотини яхшилаш, сувни тежаш технологияларини жорий этиш ва айниқса Орол денгизи ҳудудида аҳолига қаратилган дастурларни ривожлантириш бўйича қўшма ташаббуслар муҳокама қилинди.

Сув соҳасини молиялаштириш ва ирригация инфратузилмасини, сув таъминоти ва санитарияни модернизация қилиш учун инвестиция жалб қилиш масалаларига алоҳида эътибор қаратилди. Янги молиявий механизмлар, рақамли ечимлар ва халқаро ҳамкорлик моделлари кўриб чиқилмоқда, улар сув бошқарувининг барқарорлиги ва шаффофлигини узоқ муддатда таъминлайди.

Ушбу конференцияни Тошкентда ўтказилиши Ўзбекистоннинг сув ресурслари соҳасида билим ва тажриба алмашиш бўйича минтақавий марказга айланишга интилганини ҳамда мамлакатнинг барқарор ривожланиш, инновация ва очиқ халқаро мулоқотга содиқлигини тасдиқлайди.

Ўзбекистон Республикаси Сув хўжалиги вазирлиги халқаро ҳамкорлар билан биргаликда сув қонунчилигини такомиллаштириш, сув бошқарувини самаралилаштириш ва стратегик дастурларни амалга ошириш бўйича ишларни давом эттиради.