Маълумотларга кўра, республика бўйича 200 га яқин замонавий СГШлар барпо этиш учун ер майдонлари ажратилган.

Давлат раҳбарининг тегишли қарори билан ҳудудларда СГШлар қуриш учун ер майдонларини имтиёзли шартларда мақсадли ажратиш белгиланган.

Прокуратура органлари томонидан ўтказилаётган назорат тадбирларида эса қарор талабларига зид равишда сайёҳлар, айниқса, зиёратчилар учун етарли замонавий санитар-гигиеник шохобчалар (СГШ (биотуалетлар) учун ажратилган ер майдонларидан бошқа мақсадларда фойдаланиш ҳолатлари мавжудлиги маълум бўлган.

Хусусан, Ангрен шаҳар қурилиш ҳамда кадастр бўлими мансабдор шахслари томонидан замонавий СГШ қуриш учун ажратилган ер майдонларида овқатланиш шохобчалари ташкил этилишига йўл қўйилиб, фуқаро Н.Ж. ва А.П.ларга ноқонуний тарзда кадастр ва бошқа эгалик ҳуқуқини белгиловчи ҳужжатлар тайёрлаб берилган.

Шу каби, Олмалиқ шаҳар, А.Темур кўчасида фуқаро Б.М.га ажратилган ер майдонида савдо дўкони ташкил этилиб, кадастр ҳужжатлари тайёрлаб берилгани аниқланган.

Маълум қилинишича, мазкур ҳолатлар юзасидан Ангрен ва Олмалиқ шаҳар кадастр ҳамда қурилиш бўлимлари мансабдор шахсларига нисбатан жиноят иши қўзғатилиб, дастлабки тергов ҳаракатлари олиб борилмоқда.