Ташқи меҳнат миграцияси агентлиги Ташқи меҳнат миграцияси агентлиги фаолияти таҳлили, соҳадаги янгиликлар бўйича айрим рақамларни маълум қилди. Қайд этилишича, Меҳнат миграцияси географиясини кенгайтириш мақсадида 10 та хорижий давлатнинг 74 та ваколатли ташкилотлари ва салоҳиятли иш берувчилари билан ҳамкорлик келишувлари имзоланган. Йил бошидан 100 мингга яқин бўш иш ўринлари аниқланиб, улардан 20 мингга яқин бўш иш ўринларига талабномалар олинган. Ҳисобот даврида, Жанубий Корея, Буюк Британия, Россия, Қозоғистон, Германия, Туркия, Руминия, Болгария, Япония, Литва, Полша, Латвия давлатларида жами 28 207 нафар ўзбекистонлик манзилли ишларга жойлаштирилган. Меҳнат мигрантлари ҳуқуқ ва манфаатларини ҳимоя қилиш, моддий ёрдам кўрсатиш йўналишида 180 мингга яқин фуқарога хизматлар кўрсатилган. Шундан, 161 мингдан ортиғига маслаҳат хизмати, 9 300 га яқинига ҳуқуқий, 8 000 дан ортиғига ижтимоий, 1 993 нафарига эса моддий моддий ёрдам кўрсатилган. Шунингдек, 39 нафар фуқаро хорижда вақтинчалик хостелларга жойлаштирилган, оғир вазиятларга тушиб қолган 380 нафар юртдошимиз эса Ўзбекистонга олиб келинган. Агентликнинг хориждаги ваколатхоналари аралашуви билан юртдошларимиз иш берувчиларидан 676 минг АҚШ доллари миқдоридаги иш ҳақлари ундириб берилган. Келтирилишича, Бугунги кунда Германия, Исроил, Япония, Финляндия, Туркия, Россия, Латвия, Литва, Болгария, Полша каби давлатларда тиббиёт, ҳайдовчилик, қурилиш, ишлаб чиқариш ва хизмат кўрсатиш соҳаларида бўш иш ўринлари таклиф этилмоқда.