Буюк Британиянинг Малверн шаҳрида "Royal Three Counties Show" қишлоқ хўжалиги кўргазмаси бўлиб ўтди.

Кўргазма давомида фермерлар ва ҳунармандлар ўртасида тажриба алмашиш, янги билимлар ҳамда технологиялар билан танишиш имконияти яратилди. Турли семинарлар ва конференциялар ташкил этилди.

Тадбир маҳаллий ишлаб чиқарувчилар учун янги бозорларни очиш ва ўз маҳсулотларини кенгроқ аудиторияга етказишга, шунингдек, маҳаллий аҳолини бирлаштириб, улар ўртасида ҳамжиҳатлик ва дўстликни мустаҳкамлашга хизмат қилади.

Херефордшир округи кенгаши раиси Рожер Филлипс томонидан Британия ва Ўзбекистон ўртасида барча соҳаларда конструктив ўзаро манфаатли ҳамкорлик ривожланиб бораётгани эътироф этилди. Хусусан, томонлар чорвачилик маҳсулотларини етказиб бериш бўйича ҳамкорлик қилишнинг катта истиқболлари мавжудлигини билдирди. Ветеринария ва чорвачилик йўналишида олий таълим муассасалари ва илмий тадқиқот институтлари ўртасида ҳамда ёш олимлар тайёрлаш борасида ҳамкорлик қилиш каби муҳим жиҳатларга алоҳида эътибор қаратилди.

"Royal Three Counties Show" кўргазмаси 1958 йилда ташкил этилган ва шу вақтдан бери ҳар йили ўтказилади. Ушбу кўргазмада Вустершир, Херефордшир ва Глостершир графликларининг 200 дан зиёд қишлоқ хўжалиги ҳамжамиятлари иштирок этиб, 1200 дан ортиқ фермерлар, ҳунармандлар ва ишлаб чиқарувчилар ўз маҳсулотларини намойиш этадилар.