Ўзбекистон Бош консулхонаси кўмагида Бухоро вилояти ҳокимининг инвестициялар ва ташқи савдо масалалари бўйича ўринбосари Ризо Асадов бошчилигидаги делегациянинг Россиянинг Ростов вилоятига амалий сафари уюштирилди.

Бухоро вилояти делегацияси ташриф доирасида Ростов вилояти губернаторининг биринчи ўринбосари Александр Скрябин билан учрашув ўтказдилар.

Россия томони Бухоро вилоятининг савдо-иқтисодий, инвестициявий ва туризм салоҳияти билан таништирилди. Бухоро ва Ростов вилоятларининг салоҳиятини инобатга олиб, Ўзбекистон томони инвестицияларни жалб қилиш, ўзаро экспорт ва туристлар оқимини кўпайтиришга оид йўналишларда ҳамкорлик муносабатларини жадаллаштиришни таклиф этди. Хусусан, Бухоро вилоятида ташкил этилган тўртта эркин иқтисодий зонада ростовлик тадбиркорлар фаол иштирок этишга чақирилди.

Томонлар икки томон учун манфаатли ва пухта ишланган лойиҳаларни ишлаб чиқиш зарурлигига эътибор қаратдилар.

Натижада, Бухоро ва Ростов вилоятлари ўртасида савдо-иқтисодий, маданият, таълим ва бошқа соҳалардаги ҳамкорлик алоқаларини янада мустаҳкамлаш мақсадида ўзаро мулоқотларни давом эттириш тўғрисида келишиб олинди.

Ўзбекистон делегацияси, шунингдек, Ростов-Дон шаҳридаги "Элис Фешн Рус" тикув фабрикасида бўлиб, корхона фаолияти билан танишди.

Мазкур корхона раҳбарияти билан бўлиб ўтган учрашувда корхона ўтган йиллар мобайнида маҳсулот учун зарур матоларни Бухоро вилоятидан импорт қилгани маълум қилинди. Бироқ, айрим сабабларга кўра, ушбу ҳамкорлик тўхтаб қолган. Фабрика раҳбарияти Бухородан хом ашё импорт қилишни давом эттиришга тайёрлигини билдирди.

Бухоро вилояти ҳокимлиги делегациясининг Ростов вилоятига амалий ташрифи якунлари бўйича, томонлар ҳудудлараро ҳамкорлик "йўл харитаси" лойиҳасини ишлаб чиқиш ва ўзаро манфаатли алоқаларни йўлга қуйиш тўғрисида келишиб олдилар.