Таиланднинг оммабоп "Elite Plus" электрон нашрида ўзбек миллий таомлари ҳақида мақола эълон қилинди.

Мазкур мақола Ўзбекистоннинг Бангкок шаҳридаги бош консули Фахриддин Султонов билан кечган суҳбат асосида тайёрланган.

Қайд этилганидек, ўзбек ошхонаси ўзининг мазали таомлари билан ажралиб туради. Шунингдек, ўзбек миллий таомлари Ўзбекистоннинг уч минг йиллик бой тарихини ўзида мужассам этади.

"Ҳудудларимизнинг жадал ривожланиши Буюк ипак йўли билан билан боғлиқ. Буюк ипак йўли кесиб ўтган қадимий шаҳарларимиз бўйлаб карвонсаройлар қурилган. Улар сайёҳлар ва савдогарлар учун дам олиш маскани бўлиб хизмат қилган. Шунингдек, уларнинг ошпазлик анъаналарининг энг яхши жиҳатлари сақланиб қолинган. Ўзбек ошхонасида бугунги кунда барча турдаги таомлар, қандолат маҳсулотлари, салатлар ва ичимликлар тайёрлашнинг ажойиб анъаналари мавжуд", дея бош консул сўзларидан иқтибос келтирган нашр.

Маълум қилинганидек, 2018 йилда "National Geographic Traveler Awards" томонидан эълон қилинган энг яхши сайёҳлик йўналишлари бўйича сўровда гастрономик туризм йўналишида Ўзбекистон биринчи ўринни эгаллаган.

Ўзбек ошхонаси асосан Осиё анъаналари ва рецептлари асосида шаклланган. Энг машҳур таомлар қўй ва мол гўштидан тайёрланади. Бунга мисол миллий палов рецепти бўлиб, унда бир кило гўшт учун бир кило гуруч ишлатилади. Ўзбекистон энг машҳур ва оммабоп таом — бу паловдир.

"Ўзбек халқи учун нон муқаддас бўлиб, кўплаб анъаналар у билан чамбарчас боғлиқ. Дастурхон бошида нон қўл билан бўлинади ва меҳмонларга улашилади. Шунингдек, ўзбек халқи нонни ҳеч қачон тескари қўймайди. Ўзбекистонда байрам дастурхонларида одатда фақат жуфт сонли нонлар қўйилади", — деб таъкидлаган "Elite Plus".