Оила жамиятнинг энг асосий бўғини сифатида, қадриятлар, анъаналар ва одатларни сақлашда муҳим рол ўйнайди ҳамда бу анъаналарни авлодларга улашишда ҳал қилувчи аҳамиятга эга. Оила тинч бўлса, маҳалла тинч, жамият фаровон, давлат мустаҳкам.

Бирлашган Миллатлар Ташкилоти Бош Ассамблеясининг 1993 йил 15 майдаги А/РЕС/47/237-резолюцияси билан мазкур кун “Халқаро оила куни” сифатида эътироф этилган. 1994 йилдан бошлаб ушбу кун нишонланиб келинмоқда.

Ўшандан буён оила қадриятларини мустаҳкамлаш, шунингдек, оилалар муаммолари, уларни ҳал этиш зарурлигига жамоатчилик эътиборини қаратиш мақсадида ушбу байрам дунёнинг кўплаб мамлакатларида нишонланиб келинмоқда.

Оила ва иқлим

Ҳар йили Халқаро оила куни учун долзарб мавзулар танланади. Масалан, 2024 йил “Оила фаровонлиги ва иқлим ўзгариши” мавзуси танланди. Бу билан иқлим ўзгаришининг оилаларга қандай таъсир қилиши ҳамда иқлим ўзгаришига қарши курашда оилаларнинг роли ҳақида хабардорликни оширишга қаратилган тадбирлар назарда тутилган.

 

Халқаро оила куни белгиси

Тадбирнинг ўзига хос белгиси бор: яшил доиранинг марказида том остидаги юракни белгилайдиган қизил чизиқ. Бу севги ва ўзаро ҳурмат ҳукмронлик қиладиган уйни ифодалайди.

Ўзбекистонда оила куни

2024 йилда Халқаро оила куни нишонлай бошланганига 30 йил тўлди. Хусусан, Ўзбекистонда ҳам 15 май Халқаро оила куни сифатида кенг нишонланади. Бу Ўзбекистон Республикаси Президентининг 2018 йил 27 июндаги ПҚ – 3808-сон қарорига мувофиқ белгиланган.

Ушбу Қарор билан Ўзбекистонда оила институтини мустаҳкамлаш концепцияси тасдиқланган ва унда оила қадриятлари ва анъаналарини сақлаш, шунингдек, оиланинг жамиятдаги роли ва аҳамиятини таъкидлаш масалалари ёритилган.

Мазкур концепция ва уни амалга ошириш бўйича “Йўл харитаси” оила қадриятларини, оилавий можароларни ҳал этиш механизмларини, шунингдек, ажрашаётган аёллар ва болалар ҳуқуқларини ҳимоя қилиш каби муҳим масалаларга эътибор қаратишни назарда тутган.

Ўзбекистон Республикаси Конституциясига асосан оила жамиятнинг пойдевори ҳамда у жамият ва давлат муҳофазаси остида, никоҳ Ўзбекистон халқининг анъанавий оилавий қадриятларига, никоҳланувчиларнинг ихтиёрий розилигига ва тенг ҳуқуқлилигига асосланади.

Бу қоидалар оиланинг жамиятдаги роли ва аҳамиятини, шунингдек, фуқароларнинг оилавий ҳаётини давлат томонидан қўллаб-қувватланишини таъминлаш мақсадида киритилган.

Конституцияда белгиланган бу тамойиллар оила институтининг муҳофаза этилишига кўмаклашади ва оилавий қадриятларнинг мустаҳкамлиги билан бир қаторда, оила аъзоларининг ҳуқуқлари ва эркинликларини ҳам ҳимоя қилади.

Бу куннинг нишонланиши, оилавий муносабатларни мустаҳкамлаш, оила аъзоларининг бир-бирига бўлган меҳри-муҳаббатлари ҳамда бирлиги ва мамлакатимизнинг фаровонлигини таъминлайдиган асосий омил сифатида оиланинг аҳамиятини улуғлашга хизмат қилади.

давоми...